ملګرو ملتونو په یوه تازه راپور کې په افغانستان کې د کوکنارو د کښت پر ډېروالي اندېښنه ښوولې
ملګرو ملتونو ویلي چې په افغانستان کې د کوکنارو کرکیلې په ډېرېدو اندېښمن یوو.
سره له دې چې په افغانستان کې د کوکنارو کښت په رسمي ډول منع شوی دی، د ملګرو ملتونو له مخدره موادو او جرمونو سره د مبارزې دفتر په خپل تازه راپور کې ویلي چې د ۲۰۲۴ کال په اوږدو کې د کوکنارو کر ۱۹ سلنه زیات شوی دی.
نور ولولئ: ایران: افغانستان کې د نشه یي توکو د تولید له امله تر سخت ګواښ لاندې یو
نور ولولئ: له افغانستانه د نشهیي توکو په قاچاق کې د ۲۱سلنه زیاتوالي په اړه د ایران اندېښنه
د ملګرو ملتونو په وینا، تېر کال په افغانستان کې پر ۱۰،۸۰۰ هکتاره ځمکه کوکنار کرل شوي وو، خو دا شمېره سږ کال ۱۲،۸۰۰ هکتارو ته لوړه شوې ده. راپور، چې د چهارشنبې په ورځ خپور شو، څرګندوي چې په شمال ختیځو سیمو کې د کوکنارو کښت زیات شوی او د تریاکو د هر کیلو بیه ۷۳۰ ډالرو ته رسېدلې ده.
د اقتصادي فرصتونو د ملګرو ملتونو ټینګار
د ملګرو ملتونو دفتر ټینګار کړی چې باید د افغان بزګرانو ملاتړ وشي او اقتصادي فرصتونه ورته برابر کړل شي څو له غیرقانوني بازارونو څخه ځان خلاص کړي.
د دې دفتر اجرايي مدیرې، غاده والي، وویل: “که څه هم د کوکنارو کښت په افغانستان کې کم پاتې دی، موږ مسوولیت لرو چې افغان بزګرانو ته د دوامدار عاید سرچینې برابرې کړو.”
هغې زیاته کړه چې د افغانستان خلک له جدي مالي او بشري ستونزو سره مخامخ دي او بدیل عایداتو ته اړتیا لري.
راپور دا هم په ګوته کوي چې د کوکنارو د کښت جغرافیه له جنوب لویدیځ څخه، چې په دودیز ډول د کوکنارو د کر مهم مرکز ګڼل کېده، شمال ختیځو ولایتونو ته انتقال شوی، چېرته چې ۵۹ سلنه کوکنار کرل شوي دي.
د مخدره موادو په قاچاق کې د طالبانو لاس
د دې بدلون معنا دا ده چې د ۲۰۲۳ کال پرتله په شمال ختیځو ولایتونو کې د کوکنارو کښت ۳۸۱ سلنه زیات شوی دی.
له بلې خوا د نظر خاوندان وايي چې د طالبانو د رژیم اوسني اکثره واکمنان یا مشران د مخدره توکو کاروباریان دي او دوی د همدې قاچاق له امله سرمایه داران شوي دي.
خو د طالبانو په واک ته رسېدو، دغه ډلې په کندهار، نیمروز، فراه، هلمند، ارزګان او غزني ولایتونو کې امر صادر کړ چې د کوکنارو کرکیله بنده ده، خو اوس ملګري ملتونه وايي چې پر دې سربېره بیا په کې زیاتوالی راغلی دی.
