د پاکستان استازی زمان مهدي د طالبانو له لوري پر ښځو بندیزونه د منلو وړ نه بولي

د ملګرو ملتونو د بشري حقونو په غونډه کې د پاکستان استازي “زمان مهدي” ویلي، چې دغه هېواد د اسلامي همکاریو د سازمان له دریځ سره سم، د ښځو پر زده کړو او کارموندنې د طالبانو بندیز د منلو وړ نه بولي او پر دې موضوع د بیا غور غوښتنه کوي.

نوموړي له طالبانو وغوښتل چې په افغانستان کې د ښځو او نجونو پر وړاندې پر خپلو محدودیتونو له سره غور وکړي او د هېواد د نړیوالو بشري حقونو له ژمنو سره سم د ټولو افغانانو لپاره د زده کړو او کار په برخه کې مساوي لاسرسی رامنځته کړي.

په افغانستان کې روان بشري ناورین

د “ډان نیوز” د راپور له مخې، د پاکستان استازي له نړیوالې ټولنې وغوښتل چې په افغانستان کې روان بشري ناورین ته هم پام وکړي.

هغه زیاته کړه: په داسې حال کې چې په افغانستان کښې د بشری حقوقو وضعیت لا هم د جدی اندیښنې وړ دی، دغه بشری ناورین چې د دغه هیواد خلک په کې ګیر دی، د نړیوالې ټولنې ورته پاملرنې ته اړتیا لری.

د پاکستان استازي همداراز یادونه وکړه چې اوس مهال د افغانستان ۹۷ سلنه خلک په خورا بې وزلۍ کې ژوند کوي او له ۲۰ میلیونو ډېر خلک له لوږې سره مخ دي.

هغه څرګنده کړه: له بده مرغه بشري مرستو او د افغانستان د کمزوري اقتصاد د ساتنې اړتیا ته د شورا په راپور کې کافي پاملرنه نه ده شوې.

د ښځو د حقونو نقض او نړیوال غبرګونونه

پر طالبانو د ښځو د حقونو د پراخ نقض له امله بیا- بیا نیوکې كیږي او نړیوال فشارونه موجود دي. خو طالبان وايي، داد هېواد داخله مسئله ده او نړیوال حق نه لري چې د افغانستان په کورنیو چارو کې مداخله وکړي.

نور ولولئ: ملګري ملتونه او بشر حقونه: طالبان دې د ښځو پر وړاندې تبعیضي چلند بس کړي

طالبانو د ملګرو ملتونو د بشري حقونو د شورا پرونۍ غونډې او په ځانګړي ډول د افغانستان د بشري حقونو له وضعیت څخه د ملګرو ملتونو د ځانګړي راپور ورکوونکي ریچارډ بنټ راپور د واقعیتونو خلاف او د دوی خلاف تبلیغات ګڼلي دي. دا ډول غبرګونونه، نه یوازې نړیوال ښيي بلکې هر افغان غواړي چې د ښځو پر وړاندې د تعلیم دروازې خلاصې او په بېلابېلو برخو کې دوی ته د کار زمینه برابره شي څو بشري ناروین راکم کړل شي.