هر کال د جنورۍ په میاشت کې هند او پاکستان کې د کاغذپران فیستیوال جوړیږي. چې د ښیښهيي تارونو امله یې لسګونه تنه مړه کېږي. تېره ورځ د پنجاب په ایالتي شورا کې پر کاغذپران بازۍ د بندیز لایحه په اکثریت مثبت رایو سره تصویب شوه.
په دې لایحه کې راغلي چې په کاغذپران بازۍ د بندیز له قانون څخه سرغوړونکی به په پنځه کاله قید او دوه میلیون کلدارې جریمه کېږي. او همداراز د کاغذپرانونو او ښیښه يي تارونو جوړوونکو ته د اووه کاله بند او پنځه میلیون کلدارو جریمې جزا ټاکل شوې ده.
د مسلم لیګ ګوند وکیل مجتبی شجاع الرحمن ویلي، چې د بې ګناه خلکو د ژوند ژغورلو لپاره د داسې یو قانون اړتیا وه.
باید وویل شي چې له دې وړاندې د پنجاب په مرکز لاهور ښار کې په ۲۰۰۵ کې په کاغذپران بازۍ وروسته له هغه بندیز ولګېد چې ۱۱ تنه د کاغذپرانونو په تارونو د ټپي کېدو وروسته مړه شول.
دا قانون د بسنت میلې په درشل کې تصویب شوی او په دغه مېله کې، چې په عنعنوي ډول د پسرلي موسم د رارسېدو په خوښۍ کې جوړیږي کاغذ پران بازي عامه وه.
د یادولو ده چې د بسنت عنعنوي مېله له پیړیو راهیسې هرکال جوړیږي او په ترڅ کې یې په زرګونو خلک کاغذپرانونه الوځوي. «بسنت» د «ژیړ رنګ» معنی لري چې په ژیړو ګلانو پوښل شوې ځمکه ده.
