پاکستان په دې وروستیو کې سخت ناامنه شوی او له دې امله یې پاکستان کې افغان مهاجرین سخت تنګ کړي دي
د طالبانو د بهرنیو چارو وزیر امیرخان متقي د افغانستان لپاره پاکستاني پلاوي ته وویل چې په پاکستان کې د افغان کډوالو نیونې ودروي او د لارو له بندولو لاس واخلي.
ښاغلي متقي نن په کابل کې د افغانستان لپاره د پاکستان د ځانګړي استازي اصف دراني په مشرۍ پلاوي سره په کتنه کې خبرداری ورکړ چې د یو بل خلاف د بیانونو ورکول به د دواړو خواوو ترمنځ فاصلې ډېرې کړي.
نور ولولئ: ټي ټي پي: موږ په خپلو لیکو کې افغانان نه غواړو
د پاکستان د بهرنیو چارو وزیر نن په یوه مرکه کې بیا ویلي چې د طالبانو د حکومت د بهرنیو چارو وزارت له خبرپاڼې سره سم، ښاغلي متقي له پاکستاني پلاوي سره په کتنه کې په امنیتي مسایلو سربیره په پاکستان کې د افغان مهاجرو د نیونو، د چمن – سپین بولدک په لارو کې له مسافرو سره د چلند، د سبزیجاتو او میوو د صادراتو په برخه کي د تسهیلاتو د رامنځته کولو او په کراچۍ کې د افغان سوداګرو د ترانزیتي اموالو په اړه مفصلې خبرې وکړې.
د تورخم دروازې تړل کېدو له امله زیانونه
د پاکستان له لوري د تورخم دروازې د بندېدو له کبله د دواړو خواوو سوداګروپه تېره بیا افغان سوداګرو ته د میلیونونو ډالرو تاوان واړاوه.
امیرخان متقي د دې لارې د بندېدو په غبرګون کې ویلي و چې پاکستان د افغانستان د میوو او سبزیو د صادرېدو په وخت خپلې لارې بندوي.
نور ولولئ: خیبر پښتونخوا: پر پاکستاني پوځ ځانمرګي برید ۹ پوځیان وژلي دي
دې ته ورته شکایت د افغانستان د تېر حکومت چارواکو کاوه.
امیر خان متفي نن پاکستاني پلاوي ته وویل چې امنیتي مسایل دې د مشترکو کمیټو له لارې حل شي او لویې لارې دې د سیاسي او امنیتي ملحوظاتو له کبله نه تړل کیږي.
د چترال پېښه او د پاکستاني پوځ غوصه
پاکستان په وروستیو ورځو کې د چترال د پېښې په خاطر په تورخم کې لومړی پر افغان پوله ساتو ډزې وکړې او بیا یې د لسو ورځو لپاره تورخم بند کړ.
د طالبانو د بهرنیو چارو وزارت پر اساس، پاکستاني پلاوي مشر اصف دراني وویل چې د سودګرۍ او ترانزیت او همدا راز د افغانستان او پاکستان ترمنځ د عبور په ځایونو کې د رامنځته شویو مشکلاتو لپاره به د حل لارې ومومي.
هغه زیاته کړه چې پاکستان په ډیرو برخو کې له افغانستان سره همکارۍ ته اماده دی او افغان محصلینو ته د تعلیمي بورسونو لړۍ بیا پیلوي.
د یادونې وړ ده چې چترال کې وسله والو د پاکستاني پوځ پر پوستو بریدونه وکړل چې ګڼه مرګ ژوبله یې واړوله او څو پوستې یې سقوط او وسوزولې.
