يو شمېر سوداګرې مېرمنې د خپلو لاسي صنايعو د پلور لپاره د بازار له نشتوالي شکايت کوي او وايي چې د کار د نشتوالي له امله له اقتصادي ننګونو سره مخ دي
وحیده هغه ښځه ده چې له تېرو ۴ کلونو راهیسې د لاسي صنایعو په برخه کې کار کوي او د خپلې ۷ کسیزې کورنۍ یوازینۍ ډوډۍ راوړونکې ده
وحيدې وويل، چې د لاسي صنايعو د پلور لپاره د بازار د نشتوالي له امله له اقتصادي ننګونو سره مخ ده
نور یی ولوله | امیري په دوحه کې د افغان ښځو د کارموندنې او تعلیم په اړه خبرې وکړې
نور یی ولوله | څنګه په ځوانۍ کې بریالي شو
وحيده سلطاني وويل: دوه کاله کېږي چې زموږ کار سم نه دى روان او په کور کې مو د زده کوونکو شمېر کم کړى دى، اوس په کور کې د ١٥ محصلينو پر ځاى دوه زده کوونکي لرو
په همدې حال کې یو شمېر سوداګرو ښځو پر اسلامي امارت غږ کړی چې د خپلو تولیداتو د خرڅلاو لپاره دې اسانتیاوې برابرې کړي
یوې سوداګرې میرمنې نرګس وویل: «مونږ په اسلامي امارت غږ کوو چې خلکو ته د کار کولو اجازه ورکړي، په ځانګړې توګه هغو ښځو ته چې د خپلو کورونو روزونکي دي
د سوداګرۍ او صنایعو خونې مسؤلین وايي، لاسي صنایع د کورنیو او بهرنیو بازارونو د نشتوالي له امله د زوال په حال کې دي او که اسلامي امارت دې برخې ته پاملرنه وکړي، سلګونو کسانو ته به د کار زمینه برابره شي
د سوداګرۍ او صنایعو خونې غړی ممتاز یوسفي وايي:که خصوصي سکټور ورسره مرسته وکړي، هر شرکت کولای شي تر ۱۰۰ ډېر کسان په کار وګوماري
په همدې حال کې د کانونو او صنایعو وزارت ویاند ویلي چې اسلامي امارت غواړي د صنعتکارو ښځو لپاره کورني او بهرني بازارونه پیدا کړي
د سوداګرۍ او صنایعو وزارت ویاند اخونزاده عبدالسلام جواد وویل:موږ د خپلو خویندو لاسي صنایعو ملاتړ کوو او د هېواد دننه او بهر د هغوی د لاسي صنایعو د خرڅلاو لپاره د بازار موندنې په برخه کې اسانتیاوې برابروو
د ښځو لپاره د سوداګرۍ او صنایعو خونې د شمېرو له مخې، په افغانستان کې ۴ زره ښځو د سوداګریزو فعالیتونو رسمي جواز اخیستی دی
