کندهار کې د انځرو حاصلات د تېر کال په پرتله زیات شوي
![120384089 156019016191483 7259617595541499367 o 1080x570](https://afghannow.net/wp-content/uploads/2023/09/120384089_156019016191483_7259617595541499367_o-1080x570-1-348x196.jpg)
کندهار کې د تېر کال په پرتله د انځرو حاصلات لس سلنه زیات شوي دي
د طالبانو تر واک لاندې باختر اژانس وايي چې دغه حاصلات ۱۵۰ میټریک ټنو ته رسېږي.
د کندهار د سوداګرۍ او پانګونې خونې چارواکي وايي، سږکال په کندهار او زابل ولایتونو کې د انځرو حاصلات ۱۵۰ زره میټریکه ټنه ول او د دغو انځرو ډېره برخه يې پاکستان او هند ته صادره شوې ده.
نور ولولئ: څنګه له خوږو شیانو او سره کړو خوړو سره علاقه کمه کړو؟
د کندهار د سوداګرۍ او پانګونې خونې مرستیال عبدالباقي بنا وايي، پاکستان او هند ته يې د شاوخوا ۱۶ میلیونو ډالرو په ارزښت انځر صادر کړي دي:« سږکال د کندهار او زابل ولایتونو انځرو ښه حاصلات ورکړي، سربېره پر دې چې ډېری وخت د پاکستان له لارې په سوداګرۍ له ځینو ستونزو سره مخ کېږو؛ خو موږ سږ کال د ۱۶ میلیونه ډالرو په ارزښت انځر پاکستان او هند ته صادر کړل.»
کروندګر هم له بازار خوښ دي
کروندګر هم د سږکال د انځرو د حاصلاتو څخه راضي دي او وايي، سږکال په کور دننه هم د انځرو بازار ښه و.
محمد هاشم چې د کندهار په شاه ولیکوټ ولسوالۍ کې د انځرو باغ لري وايي: « د نورو کلونو پرتله د انځرو کیفیت ښه و او ښه بازار يې هم درلود، که د پاکستان او هند تر څنګ اروپايي هېوادونو ته د انځرو صادراتو لاره هواره شي، کروندهګر او سوداګر به له انځرو څخه بیا ډېرې پیسې تر لاسه کړي.»
نور ولولئ: مڼه، چې خوړل یې معجزه کوي
خو یو شمېر سوداګر او د اقتصادي چارو شنونکي بیا د پانګونې او سوداګرۍ خونې له لوري رسنیو ته د انځرو د حاصلاتو د ورکړل شویو شمېرو په اړه نیوکې کوي.
ددا ډول راپور ورکولو په اړه نیوکې شوي دي
دوی وايي، د کندهار او زابل ولایتونو د انځرو یوازیني بازارونه هند او پاکستان دي او که دغه هېوادونه د انځرو د حاصلاتو د ډېروالي په اړه یوه شي، انځر به خپله بیه له لاسه ورکړي.
د نعمت الله نعمت په نوم یو سوداګر وايي: « د انځرو د سوداګرۍ لپاره باید سم میکانیزم او پالیسي جوړه شي، اوس د انځرو ټوله سوداګري په کلدارو کېږي او دغه سوداګري د میلیونونو ډالرو ارزښت لري، باید د افغانستان بازارونو ته دغه سوداګري د کلدارو پر ځای په ډالرو يا افغانیو وشي.»
د انځرو باغونه د کندهار په شاه ولیکوټ، نېش او معروف او د زابل په میزانه، ارغنداب، ښهر صفا او نورو سیمو کې دي چې هر کال پرېمانه حاصلات ورځينې راټولېږي.
پر دې سربېره پاکستان دا هڅه هم کوي چې په افغانستان کې د جلغوزیو بازار راوغورځوي او ددې پر ځای پاکستان ته په نه بیه لاړ شي او هلته یې بیا په خپل نوم صادر کړي.