طالبانو په خوست کې د «غرغښت» راډیو خپرونې بندې کړې
طالبانو په خوست کې په راډیوګانو کې د نجونو پر ټیلیفوني اړیکو بندیز ولګاوه
د راډیو نړیواله ورځ؛ افغانستان کې راډیویي خپرونې ولې بې کیفیته دي؟
د افغانستان د خبریالانو مرکز په خپل تازه راپور کې د خبریالانو او رسنیو د حقونو د نقض په اړه د ۲۴ سلنه زیاتوالي خبر ورکړی دی. د دې مرکز کلنۍ ارزونې ښيي چې د ۱۴۰۳ کال په اوږدو کې د ۲۲ رسنیو فعالیتونه هم درېدلي دي.
د افغانستان د خبریالانو مرکز نن یکشنبه، د کب ۲۷، چې په افغانستان کې د «خبریالانو ملي ورځ» ده، خپل کلنی راپور د رسنیو او خبریالانو د ازادۍ وضعیت په اړه خپور کړ.
د دې مرکز موندنې څرګندوي چې په ۱۴۰۳ کال کې د طالبانو له لوري د رسنیو د ازادۍ د ځپلو موارد زیات شوي دي.
د دې راپور پر بنسټ، د خبریالانو او رسنیو د حقونو د نقض پېښې د تېر کال په پرتله نږدې ۲۴ سلنه زیاتې شوې دي.
په تېرو ۱۲ میاشتو کې د افغانستان د خبریالانو مرکز لږ تر لږه د ۱۷۲ د حقونو د نقض پېښې ثبت کړې، چې د ۲۲ رسنیو د فعالیتونو درېدل او د ۵۰ خبریالانو نیول پکې شامل دي.
دا ۱۷۲ پېښې د حقونو د نقض په برخو کې د ۱۲۲ ګواښونو او لږ تر لږه د ۵۰ خبریالانو او د رسنیو د کارکوونکو د نیونې موارد لري.
د ثبت شویو پېښو له جملې لږ تر لږه ۲۲ پېښې د رسنیو د فعالیتونو بندېدلو او یا هم د بندېدو په اړه دي، چې له دې جملې ۱۵ رسنۍ تر دې راپور خپرېدو پورې د بیا فعالیت اجازه نه ده ترلاسه کړې.
