یوناما ویلي، ملګري ملتونه دې د اقلیمي بدلون په ۲۹مه غونډه کې طالبانو ته هم بلنه ولېږي
یوناما داسې مهال د اقلیمي بدلون ۲۹مې غونډې ته د طالبانو په وربللو ټینګار کوي چې د طالبانو اوسنی واکمن رژیم په کور دننه او بهر نه مشروعیت لري او نه هم رسمیت.
تازه یوناما وايي، د اقلیمي بدلون په ناستو کې چې د ملګرو ملتونو لهخوا جوړېږي باید د افغانستان د خلکو غږ هم واورېدل شي.
د اقلیمي بدلون له امله د افغانستان زیانمنېدل
یوناما تېره شپه ناوخته په اېکس پاڼه لیکلي:« له هغه ځایه چې افغانستان د اقلیمي بدلون له پلوه سخت اغېزمن شوی؛ نو په کار ده، چې د اقلیمي بدلون په نړۍواله ناسته کې هم له افغانستانه استازی وروبلل شي.»
یوناما لیکلي، چې د دغه بنسټ مشرې روزا اوتنبایوا دغه څرګندونې په افغانستان کې «د اقلیمي بدلون په یو ملي کنفرانس کې» د ګډون پر مهال کړې دي.
نور ولولئ: یوناما وايي، ۱۵ زره کسان د طالبانو په زندانونو کې پراته دي
نور ولولئ: یوناما: افغانستان کې له کلونو راهیسې مرسته رسوونکو ته خنډونه موجود دي
په پام کې ده، چې د ملګرو ملتونو د اقلیمي بدلون ۲۹م کنفرانس چې د «کوپ ۲۹» په نامه هم یادېږي، د روان کال د نومبر په میاشت د اذربایجان په پلازمېنه باکو کې جوړ شي.
تېر کال دغه کنفرانس په عربي متحده اماراتو کې جوړ شوی و، چې هغه کنفرانس ته هم د طالبانو استازی نه و وربلل شوی.
د طالبانو په رسمیت نه پېژندل کېدل
هغه مهال هم طالبانو پر دې کار نېوکه کړې وه او دا یې هم ویلي و، چې افغانستان د هغو هېوادونو په ډله کې دی چې د اقلیمي بدلون له امله یې سخت زیانونه ګاللي او باید په هغه کنفرانس کې د ګډون بلنه ورکړل شوې وای.
خو نړۍوالو بنسټونو هغه مهال هم ویلي و، چې د نړۍوالو لهخوا د طالبانو د حکومت په رسمیت نه دی پېژندل شوی او د کنفرانس سمبالوونکي نه شي کولای هغې ډلې ته بلنه ورکړي چې چا په رسمیت نه وي پېژندلي.
ملګري ملتونه وايي، افغانستان د هغو لسو هېوادونو په کتار کې راځي چې د اقلیمي بدلون له امله سخت زیانمن شوی او په تېرو دوو کالو کې یې خلکو د سر او مال درانه زیانونه هم لیدلي دي.
په ورته وخت کې طالبان د نړیوالو لخوا په رسمیت نه دي پېژندل شوي او شنونکي وايي، په کور دننه د افغان ملت لخوا هم مشروعیت نه دی ورکړل شوی.
