آيا طالبانو رښتيا په جنسي پاروونکو وسایلو بندیز لګولی؟
![HSFHA2GHCII6TBKNIBWI6S7HAY](https://afghannow.net/wp-content/uploads/2023/04/HSFHA2GHCII6TBKNIBWI6S7HAY.jpg)
په افغانستان کې یوشمېر درملتونونو او خلکو ادعا کړې چې طالبانو د کانډومونو، د امیندوارۍ ضد درملو او جنسي پاروونکو وسایلو پلور حرام او بند کړی دی، خو آیا طالبانو ریښتیا هم دغسې یو حکم صادر کړی؟
په هرات کې د مصطفي په مستعار نوم د یوه درملتون مسوول وايي، طالبانو ورته ویلي چې پېرودونکو ته کانډوم او د امیندوارۍ ضد درمل ورنه کړي:” له څو ورځو راهیسې طالبان درملتونونو او د درملو عمده پلورونکو ته وايي چې د کانډومونو، جنسي پاروونکو جلونو او درملو له پلورلو ډډه وکړي.”
هغه زیاته کړه:” طالبان دغه روغتیايي وسایل او درمل د شریعت خلاف او د کفارو عمل بولي.”
د دغه درمل پلورونکي په خبره طالبانو ویلي چې د امیندوارۍ ضد پر هغو درملو بندیز نشته چې جنسي پاروونکي ځانګړنه ونه لري.
سره له دې چې په کابل او بلخ ولایتونو کې هم د یوشمېر درملتونونو مسوولان ورته کیسه لري خو د طالبانو ادارې د عامې روغتیا وزارت دا خبر رد کړ.
نور ولولئ: د مهمو خوړو خوړل جنسي ځواک او قوت زياتوي
د دغه وزارت ویاند شرافت زمان د دې پوښتنې په ځواب کې چې آیا طالبانو په افغانستان کې د امېندوارۍ ضد درملو او وسایلو پلور منع کړی؟ وايي:” دا موضوع حقیقت نه لري.”
خو د جنسي اړیکو پر مهال د کاریدونکو ځینو روغتیايي وسایلو او کانډومونو د پلور په اړه یې څه ونه ویل.
افغان مدني فعالان وايي د خلکو د ژوندانه په بیلابیلو اړخونو د طالبانو محدودیتونو ستونزې ډېرې کړې دي
مدني فعال سبحان رستګار وايي:” د طالبانو دا پریکړه به لومړی او وروستۍ نه وي، تردې وړاندې یې هم بېلا بېلو محدودیتونو خلکو ته سخت ټکان ورکړی چې له دې ډلې د جامو پلورنځایونو کې د لباس له نانځکو د سرونو پرې کول، په تبلیغاتي تابلوګانو کې د انځور په خپرولو بندیز لگولی دی.”
د ۲۰۲۱ميلادي کال د اګست مياشتې راهیسې له کله چې طالبان دویم ځلې واک ته رسېدلي، په افغانستان کې یې بیلابیل محدودیتونه لګولي.
تر شپږم ټولګي پورته د نجونو پر زده کړو، پوهنتونونو کې د نجونونو د تحصیل پر دوام بندیز او نادولتي موسسو کې د ښځو د کار ځنډول یې هغه محدودیتونه دي چې په کور دننه او بهر کې کلک غبرګون له ځان سره لري.