د ترکیې ولسمشر د ناټو په غونډه کې وویل، ناټو ددې توان نه لري چې له اسرائیلو سره دوامداره همکاري وکړي
د ترکیې ولسمشر رجب طیب اردوغان ویلي چې د اسراییل له دولت سره د ناټو د همکارۍ دوام ناشونی دی ځکه تل ابیب چې د نسل وژنې په تور محاکمه کېږي، په دوامدار ډول د الزاماتو په پلي کولو کې پاتې راغلی.
د اناتولي خبري اژانس د راپور پر بنسټ، اردوغان جمعهشپه د جولای پر ۱۲مه د امریکا پلازمېنې واشنګټن کې د شمالي اتلانتیک تړون سازمان «ناټو» مشرانو له ناستې وروسته یوه خبري ناسته جوړه کړې ده.
هغه ټینګار کړی: «د اسراییل دولت چې زموږ د ټولنې له بنسټیزو ارزښتونو څخه یې سرغړونه کړې، ممکنه نه ده چې له ناټو سره خپلو همکاریو ته دوام ورکړي. اسراییل، د نسل وژنې په تور محاکمه کیږي، په دوامدار ډول د الزاماتو په پلي کولو کې پاتې راغلی.»
اسرائیلو د ټولې سیمې امنیت ګواښلی
هغه څرګنده کړې د اسراییل لومړي وزیر بنیامین نتنیاهو دولت د ټولې سیمې امنیت له ګواښ سره مخ کوي او هېڅ قانون په رسمیت نه پیژني.
نوموړي د خپلو خبرو په یوه بله برخه کې یادونه کړې چې له ترهګرۍ سره د مبارزې په برخه کې د متحدینو ترمنځ د همکارۍ پیاوړتیا ته اړتیا ده.
نور ولولئ: ترکیه: نن د ولسمشرۍ ټاکنو دویم پړاو رایه اچونه کېږي
نور ولولئ: ښایي ترکیه له امریکا څخه ایف-۱۶ ډوله جنګي الوتکي ونه پیري
اردوغان زیاته کړې: «موږ یو داسې هېواد یو چې مخامخ له داعش سره پر جګړه بوخت یو او له ترهګرۍ سره د مبارزې برخه کې له خپلو متحدینو څخه د ملاتړ تمه لرو.»
په شنګهای سازمان کې د غړیتوب غوښتنه
د ترکیې ولسمشر په خبره، انقره باید اوس مهال د شانګهای د همکارۍ له سازمان سره د دایمي غړي په توګه هم یو ځای شي.
رجب طیب اردوغان د غزې په تړاو د بنیامین نتانیاهو د سیاستونو یو اصلي منتقد دی.
په غزه کې د اسراییل وروستي پوځي کړنو د ډېرو هېوادونو، ان د تل ابیب د متحدینو، په ځانګړې توګه د امریکا نیوکې هم راپارولي دي.
د همدې اوونۍ د چهارشنبې ورځ د اسراییل پوځ د غزې په سوېل کې د ستر ښار پر فضا اعلامیه غورځولې او له فلسطینیانو یې غوښتي چې له سیمه پرېږدي.
