د پاکستان د بهرنیو چارو وزارت ویاند په دغه هېواد کې د داعش پټنځایونو د شتون په تړاو د طالبانو د ویاند وروستۍ څرګندونې رد کړې.
د طالبانو د حکومت ویاند ذبیح الله مجاهد تر دې وړاندې پاکستان کې پر کابل هوایي ډګر د برید د طرحه کوونکي د نیولو په غبرګون کې ویلي و چې دغه چاره پاکستان کې د داعش د پټنځایونو شتون ښيي.
په داسې حال کې چې پرون (سېشنبه د کب ۱۴مه) د امریکا ولسمشر ډونالډ ټرمپ کانګرس ته په خپله لومړۍ وینا کې ویلي چې، امریکا د پاکستان په همکارۍ یو ترهګر نیولی، چې د ۲۰۲۱ کال په اګست کې یې د کابل هوايي ډګر مخې ته مرګوني برید رهبري کړې ده.
د طالبانو ویاند مجاهد وروسته له یوې رسنۍ سره په ځانګړو خبرو کې وویلي، چې داعش ډله د پاکستان د بلوچستان د مستونګ په سیمه کې د تربیې یو مرکز هم خلاص کړی، چې له دې مرکز څخه تمویل کوي او د پاکستان نظامیانو تر حمایې لاندې دی.
نوموړي زیاته کړې؛ داسې معلومیږي، چې دوی د داعش پدیده د خپلې وسیلي په ډول استفاده کوی.
تر دې وړاندې هم د طالبانو حکومت په ځلونو پاکستان د داعش پر ملاتړ تورن کړی خو پاکستان بیا رد کړې ده.
