اطلاعاتو ته دلاسرسي او د رسنیزو سرغړونې دڅېړلو کمېسیونونه فعالېدل

ځړول شوی:مې 20, 2022 لخوا ځړول شوی:مسعود تبصرې:0

د اسلامي امارت ویاند وايي، اطلاعاتو ته د لاسرسي او د رسنیزو سرغړونو د څار کمېسیونونه بیافعال شول او ډېر ژر به خپلې عملي چارې پیل کړي. ذبیح‌الله مجاهد چې پرون (پنج‌شنبه) یې په کابل کې د یوې خبرې ناستې پر مهال خبرې کولې، همداراز ټینګار وکړ چې سرپرست حکومت د رسنیو له فعالیته ملاتړ کوي.

د اسلامي امارت ویاند او د اطلاعاتو او کلتور وزارت نشراتي مرستیال وویل: «که له دې وروسته د رسنیو او د رسنیو اړوند کومه سرغړونه وشي، د دې پر ځای چې استخبارات یا نورې ادارې ښکېدلې شي یا سپکاوی منځ‌ته راشي، د سرغړونې کمېسیون بیافعال شوی او ډېر ژر به چارې پیل کړي.»

بل لور ته د اطلاعاتو او کلتور وزارت وايي، دمګړۍ په هېواد کې ۱۷۰ رسنۍ له فعالیته پاتې شوې، خو ۱۹۸ انځورېزې او غږیزې رسنۍ فعالیت لري او لسو نورو رسنیو ته هم د فعالیت جوازونه وېشل شوي.

د اطلاعاتو او کلتور وزارت د نشراتو رییس عبدالحق حماد وايي: «له ۱۳۸۲ کال نه تر اوسه له دې وزارت سره د افغانستان ۴۰۵ غږیزې او انځوریزې رسنۍ ثبت دي. دوی خپل جوازونه اخیستي. د وزارت د سروې له مخې، اوس‌مهال په ټول افغانستان کې ۱۹۸ رسنۍ فعالې دي.»

نور یی ولوله | پاکستان د نیوزیلېنډ لخوا د درې اړخیزې لوبلړۍ بلنه ومنله

له دې سره هم‌مهاله د رسنیو د ملاتړو ادارو یو شمېر مسوولان چې په دې ناسته کې یې ګډون کړی وو، له اسلامي امارت یې غوښتنه وکړه چې د رسنیو او خبریالانو د کار اصولو ته درناوی وکړي.

د ژورنالېسټانو د بنسټونو د فدارسیون غړی محمد بشیر عاطف وايي: «حکومت باید د خبریالانو پر وړاندې د بدۍ حس له منځه یوسي او خپلو ټولو مسوولانو ته لارښوونه وکړي چې د خبریالانو حقونو ته درناوی ولري.»

د اطلاعاتو او کلتور وزارت د نشراتو مرستیال ذبیح‌الله مجاهد د رسنیو له مسوولانو غواړي چې د مطالبو په خپرولو کې ملي ګټې او اسلامي اصول په پام کې ونیسي. دا په داسې حال کې ده چې اطلاعاتو ته لاسرسي کمېسیون او د رسنیزو سرغړونو د څار کمېسیونونو د چارو ځنډېدل تل تر نیوکو لاندې نیول شوي.

ځواب دلته پرېږدئ

ستاسو برېښناليک به نه خپريږي.

زموږ په خبر پاڼه کې ګډون وکړئ
وروستي مقالې، دندې، وړیا، تفریحي خبرونه په مستقیم ډول ستاسو ان باکس ته وړاندې کړئ.
170000 پیرودونکي دلته دي.