اړوند خبرونه:
طالبان: په افغانستان کې د یوناما ماموریت اغېزناک نه دی
افغانستان کې د یوناما ماموریت یو کال نور هم وغځېده
د اسلامي امارت ویاند، ذبیح الله مجاهد پر خپل اېکس په افغانستان کې د ملګرو ملتونو د استازولۍ د دفتر (یوناما) د ماموریت غځېدو په اړه ویلي، دا ځل دې دغه اداره د “مغرضو کړیو” د لاس اله نه شي.
مجاهد نن (سهشنبه، د کب ۲۸مه) پر اېکس لیکلي، یوناما باید د افغانستان او ملګرو ملتونو او د نورو هېوادونو ترمنځ د اړیکو په پياوړتیا، د بې ځایه تحریمونو لرې کولو، د کنګل شویو شتمنیو د راخوشې کولو او په ملګرو ملتونو د افغانستان د استازولۍ څوکۍ افغانانو ته د سپارلو په موخو کار وکړي.
هغه له یوناما غوښتي چې د تېر په څېر دې خلکو ته اندېښنې نه پیدا کوي.
د ملګرو ملتونو امنیت شورا په متفقه توګه په افغانستان کې د ملګرو ملتونو د مرستندویه پلاوي (یوناما) ماموریت د یو بل کال لپاره، د ۲۰۲۶ کال د مارچ تر ۱۷مې پورې وغځاوه.
دا پریکړه پرون (دوشنبه، د مارچ ۱۷مه) په نیویارک کې د ملګرو ملتونو د امنیت شورا په مرکزي دفتر کې په یوه غونډه کې وشوه.
د دې پریکړې پر بنسټ، یوناما به د بل کال لپاره په افغانستان کې خپلو فعالیتونو ته دوام ورکړي.
یوناما، چې په ۲۰۰۲ کال کې د بن کنفرانس وروسته د امنیت شورا د ۱۴۰۱ پریکړه لیک له مخې تاسیس شوه، په افغانستان کې د تلپاتې سولې د ټینګښت، د بشري حقونو د ساتنې او د بشري مرستو د همغږۍ لپاره کار کوي.
