افغانستان د بنګله دېش د ۱۶۴ منډو په هدف په نږدې ۲۲ اورونو کې ۸۳ منډې وکړې
وروسته د باران له کبله دا لوبه ډېره وځنډیده تر دې چې افغانستان چې وار له مخه په لوبه برلاسی و د لوبې ګټونکی اعلان شو.
د کرېکټ د نړیوالې شورا د هغې فارمول له مخې چې که لوبه باران زیانمنوي څنګه اورونه او رنزونه سره پرتله شي افغانستان دا لوبه د ۱۷ منډو په توپېر وګټله.
د دغې لوبې غوره لوبغاړي افغان چټک توپ اچونکی فضل حق فاروقي اعلان شو، نوموړي په ۸ اورونو او څلورو بالونو کې درې بنګله دېشي لوبغاړي اوټ کړل او یواځې ۲۴ منډې پرې جوړې شوې وې.
دا لومړۍ ځل شو چې فاروقي په کومه نړیواله یو ورځنۍ سیالۍ کې د لوبې غوره لوبغاړی اعلانیږي.
دا لوبه دوه ځلې د بنګله دېش د توپ وهنې پر مهال او یو ځلې د افغانستان د بېتېنګ پر مهال د باران له کبله وځنډیده او بیا یې دوام ونکړ.
د بنګله دېش د لوبې پیل
بنګله دېشۍ لوبډلې د افغانستان خلاف په لومړۍ یو ورځنۍ نړیواله لوبه کې د خپلو ۹ لوبغاړو په سوځیدو ۱۶۹ منډې جوړې کړې. خو د باران له کبله زیانمنې شوې دغې لوبې ګټې لپاره افغان لوبډلې ته په ۴۳ اورونو کې د ۱۶۴ منډو جوړولو اړتیا وه.
د افغانستان او بنګله دېش تر منځ د دریو نړیوالو سیالیو د لوبلړۍ د پیل په لومړۍ لوبه کې افغان بالرانو لکه ډېر کله یو ځل بیا ښه توپ اچونه وکړه او کوربه بنګله دېش یې له ډېرو منډو جوړولو ایسار کړ.
په افغان لوبغاړو کې فضل حق فاروقي د بنګله دېش درې، راشد خان او مجیب الرحمان دوه دوه، عظمت الله عمرزي او محمد نبي یو یو لوبغاړی وسوځاوه.
نور ولولئ: افغانستان په کرکټ کې شري لنکا ته ماته ورکړه
د بنګله دېش د توپ وهنې پر مهال چې کله دوه ځلې باران وشو له کبله یې لوبه هم وځنډیده او دې چارې د لوبې ټاکلې ۵۰ اورونه هم تر ۴۳ کم کړل.
پداسې حال کې چې وار له مخه هم فکر نه کیده چې بنګله دیشي لوبغاړي به چې افغان بالرانو اوږدې لوبې ته پرېنښودل دا لوبه تر ۵۰ اورونو ورسوي.
د افغان بالرانو پر وړاندې بنګله دیش توپوهنکي
د لوبې په وروستي (۴۳م) اوور کې چې فضل حق فاروقي کاوه د وروستي لوبغاړي د اوټیدو چانس هم وه خو د راشد خان په لاس کېچ خطا شو. او ورپسې فضل حق فاروقي هم په ملا کې د درد له کبله لوبې ته دوام ورنشو کړی.
د هغه پر ځای وروستي دوه باله سلیم صافي وکړل.
د بنګله دېش یوازې یو لوبغاړی توحید حریدوی د اوږدې لوبې په لوبولو بریالی شو، نور تکړه لوبغاړي یې هاغسې ونه ځلیدل چې بنګله دېش ترې تمه کوله.
نوموړي د بنګله دېش په ګټه تر ټولو ډېرې ۵۱ منډې جوړې کړې. په نورو لوبغاړو کې ډېرې منډې د لېوټون ډاس دي، هغه ۲۶ منډې جوړې کړې او د مجیب الرحمان په بال کېچ اوټ شو.
