اسلام اباد کې د عمران خان پلویانو پراخ لاریونونه کړي دي او په دې لاریونونو کې تاوتریخوالی هم شوی دی
په داسې حال کې چې په اسلام اباد کې د تحریک انصاف پلویانو احتجاج پر مهال د تاوتریخوالي او مرګ ژوبلې رپوټونه ورکړل شوي، امریکا پر پاکستان غږ کړی چې “بشري حقونو او د خلکو بنسټیزو ازادیو” ته درناوی وکړي.
د امریکا د بهرنیو چارو وزارت ویاند مېتیو مېلر په یوه خبري غونډه کې په اسلام اباد کې د روان احتجاج په اړه د خبریال د پوښتنې په ځواب کې همدا راز له اعتراض کوونکو هم وغوښتل چې له تاوتریخوالي دې ډډه وکړي.
د امریکا غوښتنه او پر پاکستان فشار
ښاغلي مېلر وویل، “موږ په پاکستان او ټوله نړۍ کې د بیان ازادۍ او د سولهييزو راټولېدنو ملاتړ کوو. موږ پر احتجاج کوونکو غږ کوو چې مظاهرې دې یې سولهييزې وي او له تاوتریخوالي دې ډډه وکړي.”
د یادولو ده چې په اسلام اباد کې د تحریک انصاف او د عمران خان د پلویانو احتجاج روان دی او د امنیتي ادارو له لوري د هغوی د مخنیوي په هڅه کې د اعتراض کوونکو او پولیسو تر منځ اخ و ډب هم رامنځته شوی دی.
نور ولولئ: عمران خان وايي، په پاکستان کې د ځنګل قانون واکمن دی
نور ولولئ: عمران خان وايي که له محکمې ووځم نو وبه نیول شم
د اسلام آباد ډپټي کمشنرعرفان میمن بی بي سي ته ويلي چې د اساسي قانون د ۲۴۵ مادې د حکم له مخې یې له پوځه غوښتي چې د امن او نظم ټينګولو لپاره دې ښار کې ځای پر ځای شي.
د اساسي قانون د دې مادې له مخې پوځ د فدرالي حکومت په امر له هېواده د دفاع مسؤولیت لري. دغه راز که د تېرې، جګړې او یا عامه نظم او د قانون حاکمیت ته خطر پېښیږي نو د فدرالي حکومت په امر د یوه ښار، ایالت او یا د یوې سیمې د امنیت مسؤولیت پوځ په غاړه اخلي.
پر موټر د پولیسو وهل
په یوه بله جلا پېښه کې د اسلام آباد پولیس وايي سرینګر لویې لارې ته څېرمه د اسلام آباد په جي ټې سیمه کې یوه تیز رفتار موټر درې پولیس وهلي او وژلي دي.
په دې سره د پاکستان د کورنیو چارو وزارت د معلوماتو له مخې د تحریک انصاف د لاریون له پيله د وژل شویو امنيتي کسانو شمېر پنځو ته ورسېد. د کورنیو چارو وزارت دغه راز ویلي د یاد ګوند له پلویانو سره اخ و ډب کې له سلو زیات پولیس منسوبین ژوبل شوي دي.
وړاندې د پاکستان کورنیو چارو وزیر محسن نقوي له رسنیو سره د خبرو پر مهال ویلي چې “د مرمۍ ځواب په مرمۍ ورکول اسان وو” خو پولیس د مرمۍ ځواب په ربړینه ګولۍ او اوښکې بهوونکي ګاز سره ورکړ.
