د ایران د عدلیې وزارت یو پلاوی له طالبانو سره د بندیانو د تبادلې په اړه کابل ته تللی دی
په ایران کې او پاکستان کې ګڼ شمېر هغه افغان کډوال چې په دغه هېوادونو کې اوسېږي، کسان یې هلته بندیان او په زندانونو کې پراته دي.
ایران څو ورځې وړاندې ویلي وو چې ځینې هغه افغانان چې په ایران کې بندیان دي، غواړي چې طالبانو ته یې وسپاري.
کابل ته د ایراني پلاوي سفر
د طالبانو مرستیال ویاند حمدالله فطرت وايي، د ایران د عدلیې وزارت پلاوی به کابل ته د خپل سفر پر مهال د دغې ډلې له چارواکو سره په دواړو هېوادونو کې د بندیانو اړوند مسایلو په اړه خبرې وکړي.
تېره ورځ ایران اعلان وکړ، چې په دغه هېواد کې زر تنه بندي افغانان افغانستان ته ستنوي.
د طالبانو تر واک لاندې ملي ټلویزیون د پنجشنبې په ورځ د (لړم ۲۴مه) د طالبانو د ویاند مرستیال یو غږیز کلیپ خپور کړی، چې نوموړي په کې ویلي، چې د ایران د عدلیې وزارت یو پلاوی د دواړو هېوادونو د بندیانو اړوند مسایلو په اړه خبرو لپاره کابل ته ورغلی.
نور ولولئ: د ریچارډ بنېټ وروستی راپور؛ له طالبانو سره پر بندیانو ښځو جنسي تیري شوي
نور ولولئ: ایران: ۵۷۴ افغان بندیان به کابل ته وسپاري
نوموړي زیاته کړي، چې دغه ایرانی پلاوی به د طالب چارواکو سره په دواړو هېوادونو کې د بندیانو د تبادلې په اړه خبرې وکړي.
د بندیانو شمېره
دغه ایرانی پلاوی پر داسې مهال افغانستان ته سفر کوي، چې تېره ورځ د ایران دولتي اژانس د دغه هېواد د عدلیې وزارت د بشري حقونو او نړۍوالې برخې د مرستیال له قوله خبر ورکړی و، چې د ایران په زندانونو کې ۱۰۰۰ تنه بندیان افغانستان ته استوي.
د طالبانو مرستیال ویاند حمدالله فطرت د ایران لهخوا د افغان بندیانو د انتقال د پرېکړې هرکلی کړی دی.
که څه هم ایران، افغانستان ته د ۱۰۰۰ تنه افغان بندیانو د استولو په اړه خبر ورکړی؛ خو دا لا روښانه نه ده، چې په دغه هېواد کې څومره نور افغانان بندیان دي.
د راپورونو له مخې، په افغانستان کې هم د ایران اته وګړي بندیان دي.
د ایران له دې پرېکړې وروسته په دغه هېواد کې افغان بندیان د ایران پر دغه پرېکړه اعتراض کړی او ویلي یې دي چې موږ دې د طالبانو نظام ته نه سپاري.
وروسته له هغه چې په افغانستان کې اسلامي جمهوریت وپرځېده او طالبان بیا واک ته ورسېدل، نو په میلیونونو افغانانو هېواد پرېښود او نورو هېوادونو ته کډوال شول.
