د امریکا متحده ایالاتو ولسمشر ددې هېواد سمندري ځواک لپاره ښځينه مشره ټاکلي ده

که تائید شي لیزا فرانچیتي به لومړنۍ ښځه وي چې د امریکا پوځ یوې برخې مشري کوي.

د امریکا متحدو ایالتونو ولسمشر جو بایډن یوه ښځینه امیر البحر د خپل هېواد سمندري پوځ د مشرې په توګه ګومارلې ده.

دا د امریکا په تاریخ کې لومړی ځل دی، چې یوه ښځه د امریکايي پوځ یوې څانګې لپاره د مشرې په توګه ګومارل کېږي. لیزا فرانچیتي له دې مخکې په سویلي کوریا کې د امریکا سمندري پوځ د بېړیو ټولګې مشري کوله او له هغه مخکې یې د جنګي الوتکو لېږدونکې بېړۍ مشرتوب پر غاړه درلود.

خو یاده مشره باید د کانګرېس له لوری تایید شي

د امریکا ولسمشر له لوري د نوموړې ګومارنه باید د امریکا کانګرېس کې د مشرانو جرګې یا سېنټ له لوري تائید شي. که د سمندري پوځ د عملیاتي مشرې په توګه د نوموړې ګومارنه له سېنټه تائید شي، دا به لومړی ځل وي چې یوه ښځه د امریکايي ځواکونو د مرکزي قوماندې د لوړپوړيو غړیو په کتار کې شاملېږي.

نور ولولئ: جو بایډن د مراسمو پر مهال پر سټېج ولوېده

د ۳۸ کلنې پوځي قوماندانې په توګې دا په امریکايي پوځ کې دویمه ښځه وه، چې د امیر البحر څلور ستوریز منصب یې ترلاسه کړ. د امریکا ولسمشر په یوه اعلامیه کې د دې ستاینه کړې، په عملیاتي او پالیسي جوړونه کې یې د دې تجربې ”پراخې” او په وینا یې که یې ګومارنه تائید شي، ”یو ځل بیا به تاریخ جوړ کړي.”

دا ښځه د امریکا دفاع وزیر انتخاب نه وه

د امریکايي رسنیو رپوټونو کې ویل شوي، امیر البحر فرینچیتي د امریکا دفاع وزیر لوید استین لومړنی انتخاب نه و، بلکې هغه د دې منصب لپاره د سامیویل پاپارو نوم وړاندیز کړی و، چې د سمندري پوځي زدکړو معتبرې ادارې ټاپګن فارغ التحصیل دی.

ښاغلي بایډن هم امیر البحر پاپارو ته ترفیع ورکړې او په ارام سمندر کې یې د امریکايي ځواکونو قوماندان په توګه ګومارلی دی.

د امریکا کانګرېس کې د الاباما ایالت جمهوریتپال استازی ټامي تیوبرویل د ۲۷۰ پوځي ګومارنو د تائید مخه نیولی او ویل کېږي چې له همدې امله به د سمندري پوځ د مشرې ګومارنې تائید هم اسانه چاره نه وي.

نوموړي د امریکا دفاع وزارت پر هغه پالیس‍ۍ چې د سقط جنین لپاره له یوه ایالته بهر ته د پوځیانو سفر لګښت ورکوي د اعتراض په توګه دا چاره خپله کړې. ولسمشر بایډن بیا د سناتور دا چاره نه یوازې ”ناسمه، بلکې خطرناکه” بولي.

دا په داسې حال کې ده چې د امریکا ولسمشرۍ ټاکنو کې ښځینه ولسمشرۍ ته نه ده بریالۍ شوې.