جاپان زلزله؛ د ۷.۱ درجې زورورې زلزلې له امله د ګڼو کسانو د مړینې وېره
د جاپان زلزله د دغه هېواد په سوېل کې د پراخو ویجاړیو لامل شوې ده. د جاپان د کوماموتو ولایت په جنوب کې د ۷.۱ درجې زورورې زلزلې له امله یو ستر سوداګریز مرکز نړېدلی، لسګونه کسان تر کنډوالو لاندې بند پاتې دي او چارواکي د څو کسانو د وژل کېدو وېره څرګندوي.
د زلزلې له امله د برېښنا پرې کېدل، د سړکونو او پلونو زیانمنېدل، د فابریکو د لوړو دودکشونو نړېدل او د ۱۷مې پېړۍ د کوماموتو تاریخي کلا د دېوالونو زیانمنېدل هم راپور شوي دي.
د ژغورنې پراخ عملیات؛ ۳۰۰ زره کسانو ته د وتلو سپارښتنه
د جاپان لومړۍ وزیرې سانای تاکایچي ویلي، حکومت د پېښې د زیانونو ارزونه کوي او د ژغورنې ټولې ادارې د مرستې لپاره بسیج شوې دي.
د چارواکو په وینا، شاوخوا ۳۰۰ زره اوسېدونکو ته د خوندي سیمو د تګ سپارښتنه شوې او سلګونه پوځیان د ژغورنې عملیاتو لپاره سیمې ته استول شوي دي، په داسې حال کې چې د زلزلې وروسته ټکانونه لا هم دوام لري.
د شاپینګ مال تر کنډوالو لاندې لسګونه کسان بند پاتې دي
د جاپان د NHK او TV Asahi د راپورونو له مخې، د کوماموتو ولایت په تر ټولو ستر “ایون” سوداګریز مرکز کې د زلزلې له پای وروسته چاودنه شوې او د ودانۍ یوه لویه برخه نړېدلې ده.
پولیسو د څو کسانو د وژل کېدو احتمال تایید کړی، خو تر اوسه یې دقیق شمېر نه دی اعلان کړی.
راپورونه وایي، د پېښې پر مهال له ۲۰ څخه تر ۳۰ پورې کارکوونکي نادرکه شوي وو او ژغورونکي هڅه کوي چې هغوی د کنډوالو لاندې ومومي.
چارواکي وایي، د زلزلې له لومړي ټکان وروسته ټول پېرېدونکي او کارکوونکي ایستل شوي وو، خو لا هم د چاودنې اصلي لامل تر څېړنې لاندې دی او د ګازو چاودنه هم یو احتمال ګڼل کېږي. جاپان زلزله
سړکونه، پلونه او فابریکې هم سختې زیانمنې شوې
د جاپان زلزله یوازې سوداګریز مرکزونه نه، بلکې ګڼې نورې مهمې ودانۍ او زیربناوې هم زیانمنې کړې دي.
د راپورونو له مخې، د یوې کاغذ جوړونې فابریکې لوی دودکش نړېدلی او یو شمېر کسان لا هم نادرکه دي. همدارنګه په دوو روغتونونو کې له ۵۰ څخه ډېر ټپیان تر درملنې لاندې دي چې د ځینو روغتیايي وضعیت نازک ښودل شوی. جاپان زلزله
زلزلې د لویو لارو پر سړکونو ژورې درزونه هم رامنځته کړي، د اورګاډو تګ راتګ یې درولی او ځینې الوتنې هم لغوه شوې دي.
د سونامي خبرداری لغوه شو؛ اټومي بټیو کې ستونزه نه ده ثبت شوې
د زلزلې له رامنځته کېدو وروسته د سونامي خبرداری خپور شو، خو وروسته بېرته لغوه شو.
د جاپان د اټومي انرژۍ ادارې ویلي، د سیمې په اټومي بټیو کې هېڅ غیرعادي وضعیت نه دی ثبت شوی.
همدارنګه د سوني او TSMC شرکتونو ویلي چې د دوی کارکوونکي خوندي دي او تولیدي فعالیتونه په تدریجي ډول بېرته عادي حالت ته ستنېږي.
جاپان د زلزلو له ډېر اغېزمنو هېوادونو څخه دی
جاپان د نړۍ له هغو هېوادونو شمېرل کېږي چې د زلزلو له ډېر خطر سره مخ دي. دغه هېواد د “Ring of Fire” په نوم د زلزلو او اورغورځونکو غرونو په سیمه کې موقعیت لري او د نړۍ شاوخوا ۲۰ سلنه د شپږو یا تر هغې لوړې درجې زلزلې پکې ثبتېږي. جاپان زلزله
د کوماموتو سیمه لس کاله وړاندې هم د یوې خونړۍ زلزلې شاهده وه چې سلګونه کسان یې وژلي او زرګونه نور یې ټپیان کړي وو. اوسنی جاپان زلزله هم د پراخو زیانونو او مرګژوبلې له امله د وروستیو کلونو له جدي طبیعي پېښو څخه ګڼل کېږي.
