د امریکا او ایران استازي د خبرو لپاره سویس ته روان شول
د امریکا او ایران استازي د نوو ډیپلوماتیکو مذاکراتو د پیل لپاره سویس ته روان شوي دي؛ هغه خبرې چې هدف یې د لنډمهاله تفاهم پر بنسټ د یوه دوامداره او پراخ تړون رامنځته کول بلل کېږي.
د راپورونو له مخې، د امریکا د ولسمشر ډونالډ ټرمپ ځانګړی استازی سټیو ویتکاف د شنبې په ورځ سویس ته رسېدلی، او ټاکل شوې چې د ایران د بهرنیو چارو وزیر عباس عراقچي هم هلته ورشي او له امریکایي لوري سره مستقیمې خبرې ترسره کړي.
خبرې د سیمهییزو تحولاتو په سیوري کې
دغه مذاکرات په داسې وخت کې ترسره کېږي چې په سیمه کې امنیتي وضعیت لا هم نازک دی. د اسراییل او حزبالله ترمنځ له اوربند وروسته، په لبنان کې تازه هوايي او ډرون بریدونو لږ تر لږه پنځه کسان وژلي دي.
شنونکي باور لري چې دا ډول پېښې کولای شي د اوربند دوام او د سولې روان بهیر له خطر سره مخ کړي. د لبنان اوربند د هغه ۱۴ مادهییز لومړني تفاهم یوه مهمه برخه بلل کېږي چې په بېلابېلو محاذونو کې د پوځي عملیاتو د درولو غوښتنه کوي.
د امریکا او ایران استازي، ایران او امریکا څه وايي؟
ایران ټینګار کړی چې امریکا باید د شویو ژمنو د عملي کېدو ضمانت ورکړي. بل لور ته د امریکا مرستیال ولسمشر جي ډي وینس خپل ټاکل شوی سفر لغوه کړی او د مذاکراتو چارې د سټیو ویتکاف پر غاړه پرېښودل شوې دي.
د سویس حکومت هم اعلان کړی چې د دواړو لوریو د خبرو اترو د کوربهتوب لپاره بشپړ چمتووالی لري.
د احتمالي تړون مهم موارد
د راپورونو له مخې، د امریکا او ایران استازي د داسې تفاهم پر سر بحث کوي چې په کې د ځینو بندیزونو لرې کول، د ایران د کنګل شویو شتمنیو د برخې ازادول او د اقتصادي بیارغونې لپاره د مالي ملاتړ طرحې شاملې دي.
دا خبرې وروسته له هغې پیل شوې چې د ایران او اسراییل ترمنځ وروستۍ شخړې د سیمې امنیتي وضعیت کړکېچن کړ او د انرژۍ پر نړیوالو بازارونو یې هم اغېز وکړ. د امریکا او ایران استازي
کارپوهان وايي که مذاکرات بریالي شي، نو ښايي د واشنګټن او تهران ترمنځ د اړیکو په راتلونکې او د سیمې په امنیتي معادلو کې مهم بدلونونه رامنځته کړي.
