د امریکا بهرنیو چارو وزیر انتوني بلېنکن اسرائیلو ته ورسېده
![blinken](https://afghannow.net/wp-content/uploads/2024/01/Blinken-1-780x470.jpg)
بلېنکن داسې مهال اسرائیلو ته رسېږي چې اسراییلو غزه محاصره او په لسګونه زره فلسطینیان یې وژلي
امریکا په ښکاره هڅه کوي چې د جګړې د پراخېدو مخه ونیسي، خو له بل لوري له اسرائیلو سره مرسته او په نړیوال سټېج یې د جنايتونو دفاع کوي.
د امريکا د بهرنيو چارو وزير انتوني بلېنکن منځني ختيځ ته د خپل سفر په ترڅ کې اسرائیلو ته رسېدلی او يو ځل بيا يې له اسرائیلو وغوښتل چې په غزه کې د ملکي وګړو د مرګ ژوبلې د کمولو لپاره نور ګامونه اوچت کړي.
![gaza2](https://afghannow.net/wp-content/uploads/2024/01/Gaza2-1-300x170.jpg)
اسرائیلو ته د بلېنکن سفر او د لیدنو پلان
تل ابیب ته د خپل سفر په پیل کې ښاغلي بلېنکن د اسرائیلو له ولسمشر اسحاق هرزوګ سره خبرې وکړې.
د امریکا د بهرنیو چارو وزیر انتوني بلینکن د خپل وروستي ډیپلوماتیک سفر په ترڅ کې د متحده عربي اماراتو او سعودي عربستان له مشرانو سره وکتل او د فلسطین په تړاو یې خبرې یې ورسره وکړې. نوموړی به د اسرائیلو له لومړي وزیر بنیامین نتنیاهو سره هم وګوري.
انتوني بلینکن پرون د سعودي له ولیعهد محمد بن سلمان سره تر کتنې وروسته د شخړو د زیاتېدو په اړه خبرداری ورکړی و.
![gaza](https://afghannow.net/wp-content/uploads/2024/01/Gaza-1-300x170.jpg)
پر غزې د اسرائیلو د برید او محاصرې موده
د نوموړي دغه سفر یوه ورځ وروسته له هغه کېږي چې په سوریه او لبنان کې د بې پیلوټه الوتکو بریدونو د حماس او حزب الله جګپوړي غړي وژلي دي.
نور ولولئ: د حماس-اسراییلو له جګړې سره سم، پر امریکايي اډو هم بریدونه زیات شوي
نور ولولئ: د امریکا د بهرنیو چارو وزیر: په غزه کې د ملکي وګړو وژنه ناورین دی
نور ولولئ: بلېکن وايي، له ایران سره د اټومي هوکړې پر سر خبرې نه کوو
د امریکا د بهرنیو چارو وزیر منځني ختیځ ته د خپل سفر پر مهال دا ټینګار هم کړی، چې په یمن کې د حوثي یاغیانو له خوا په سور سمندرګي کې پر کښتیو بریدونه باید ودرول شي.
په همدې وخت کې په ملګرو ملتو کښې د ایران استازی امنیت شورا ته په یو لیک کښې په سور سمندرګی کښې د حوثیانو په بریدونو کې د ایران د لاس لرلو په تړاو د امریکا او اسرائیلو تورونه رد کړل.
په غزه کې د اسرائیلو له جګړې وروسته په سیمه کې کړکېچ زیات شوی او پر غزې سربېره لویدیځه څنډه، لبنان، سوریه، عراق او سور سمندرګی هم د دې جګړې په تړاو د بریدونو شاهدې دي.
په غزه کې د حماس طبي چارواکي وايي، د اسرائیلو د بریدونو له پیل راهیسې تر اوسه په غزه کې د اسرائیلو د بریدونو په پایله کې تر ۲۳۰۰۰ زیات کسان وژل شوي دي.