د برېښنا شپږ پروژې د ۲ میلیارد او ۸۷۳ میلیون افغانیو په ارزښت منظورې شوې. په دغو پروژو کې د سبسټېشنونو جوړول او د برېښنا د لېږد لینونو غځول شامل دي.
د ریاستالوزراء اقتصادي معاونیت خبر ورکړی چې د تدارکاتو کمېسیون په وروستۍ غونډه کې د ۲ میلیارد او ۸۷۳ میلیون افغانیو په ارزښت د برېښنا اړوند شپږ پروژې تصویب کړې دي.
د اقتصادي معاونیت د معلوماتو له مخې، دا پروژې د هېواد په بېلابېلو ولایتونو کې د برېښنا د لېږد او اړوندو تأسیساتو د پراختیا لپاره په پام کې نیول شوې دي.
د برېښنا شپږ پروژې په کومو ولایتونو کې پلې کېږي؟
د تصویب شویو پروژو له ډلې یوه د ننګرهار ولایت د حصارشاهي سبسټېشن د ۲۲۰ کیلوولټ برېښنا لین پراختیا ده.
په فاریاب ولایت کې د میمنې او اندخوی سبسټېشنونو جوړول او پراختیا هم د یادو پروژو برخه ده.
همداراز، د جوزجان ولایت د یتیمتاق سیمې د ګازو فابریکې ته د انرژۍ د لېږد لپاره د ۴۰ مېګاولټ امپیره ظرفیت لرونکي سبسټېشن جوړول منظور شوي دي.
اقتصادي معاونیت ویلي چې د برېښنا شپږ پروژې د لېږد لینونو غځول او د تخنیکي تجهیزاتو برابرول هم رانغاړي.
د برېښنا د لېږد لینونو او تجهیزاتو جزئیات
د پروژو په تخنیکي برخو کې له اندخوی سبسټېشن څخه تر میمنې سبسټېشن پورې د ۱۳۹٫۲ کیلومتره په اوږدوالي د ۲۲۰ کیلوولټ برېښنا لین غځول شامل دي.
دغه راز، د SDH او PABX مخابراتي سیسټمونو لپاره د اړینو تجهیزاتو پېرل هم تصویب شوي دي.
بله پروژه د ارغندۍ–غزني د ۲۲۰ کیلوولټ انتقالي لین څخه د میدان وردګ ولایت تر پلان شوي سبسټېشن پورې د ۹٫۳ کیلومتره برېښنا لین غځول دي.
د اقتصادي معاونیت د اعلان له مخې، د برېښنا شپږ پروژې د تدارکاتو کمېسیون له لوري منظورې شوې دي؛ خو د عملي کار د پیل او بشپړېدو کره نېټې نه دي په ډاګه شوې.
