په کابل کې د افغانستان د کانونو لومړنی تخصصي نندارتون دوام لري. په دې نندارتون کې ۱۵۰ شرکتونه ګډون لري او چارواکي د کانونو په برخه کې د پانګونې د پراختیا غوښتنه کوي.
په کابل کې د افغانستان د کانونو لومړنی ځانګړی تخصصي نندارتون، چې پرون پرانیستل شو، نن هم د کورنیو او بهرنیو شرکتونو د ګډون په دوام سره روان دی.
په دغه نندارتون کې د ایران، چین او هند په ګډون ۱۵۰ شرکتونو په ۱۵۰ غرفو کې د کانونو له سکټور سره اړوند محصولات، وسایل او خدمات نندارې ته وړاندې کړي دي.
د کانونو او پټرولیم وزارت د معلوماتو له مخې، دا نندارتون د باختر درخشان نندارتونونو جوړولو شرکت په همکارۍ تنظیم شوی او د لړم تر نهمې نېټې به دوام ولري.
د کانونو نندارتون د پانګونې لپاره کوم فرصتونه وړاندې کوي؟
د پرانیستې په مراسمو کې د ریاستالوزرا اداري مرستیال مولوي عبدالسلام حنفي وویل چې د دغه ډول نندارتونونو جوړول د افغانستان د اقتصادي ودې لپاره مهم دي.
د نوموړي په وینا، ددې موخه یوازې د معدني محصولاتو معرفي کول نه دي، بلکې د کورنیو او بهرنیو پانګهوالو ترمنځ د اړیکو او همکارۍ پراختیا هم ده.
حنفي له پانګهوالو وغوښتل چې د افغانستان د کانونو په برخه کې پانګونه وکړي. هغه وویل چې حکومت د پانګونې د اسانتیاوو برابرولو ته چمتو دی او هڅه کوي چې معدني زېرمې په معیاري ډول استخراج شي.
نوموړي همدارنګه وویل چې بهرني شرکتونه کولای شي د پانګونې لپاره ځمکه د اوږدمهالو قراردادونو له لارې په اجاره واخلي.
د کانونو په سکټور کې ۳۵۰ فعال قراردادونه او ۱۸۰ زره کارکوونکي
د کانونو او پټرولیم وزیر ملا هدایتالله بدري د نندارتون د پرانیستې پر مهال وویل چې اوس مهال د افغانستان د کانونو په سکټور کې ۳۵۰ قراردادونه فعال دي.
د هغه په وینا، د کانونو د استخراج په برخه کې له ۱۸۰ زرو څخه ډېر کسان په کار بوخت دي.
بدري زیاته کړه چې افغانستان پراخې معدني زېرمې لري او حکومت غواړي د دغو سرچینو له عوایدو د هېواد د اقتصاد او عامه ګټو لپاره کار واخلي.
په همدې مراسمو کې د صنعت او سوداګرۍ وزیر نورالدین عزیزي هم له کورنیو او بهرنیو پانګهوالو وغوښتل چې د افغانستان د کانونو په سکټور کې خپلې پانګونې پراخې کړي.
هغه ټینګار وکړ چې معدني توکي باید د امکان تر حده د افغانستان دننه پروسس شي، څو د خامو موادو د صادراتو پر ځای په هېواد کې د تولید او کارموندنې فرصتونه زیات شي.
د کابل دغه تخصصي نندارتون د معدني محصولاتو د معرفي کولو ترڅنګ شرکتونو ته د اړیکو جوړولو او د احتمالي سوداګریزو همکاریو د ارزولو زمینه برابروي.
ټاکل شوې چې نندارتون د لړم تر نهمې نېټې پورې پرانیستی وي او علاقهمند شرکتونه او لیدونکي وکولای شي د کانونو له اړوندو محصولاتو او فعالیتونو سره اشنا شي.
