د بښنې نړیوال سازمان له پاکستانه د افغان کډوالو ویستل ګواښکوونکي بولي
![pakistan afghan refugee camp](https://afghannow.net/wp-content/uploads/2023/10/pakistan-afghan-refugee-camp-348x196.jpg)
دغه سازمان وايي که په دومره لوی شمېر افغان کډوال په جبري توګه له پاکستان وویستل شي، کډوالو ته جدي ګواښ دی
د بښنې نړۍوال سازمان د چهارشنبې په ورځ د پاکستان له حکومته وغوښتل، چې د افغان کډوالو “تاریخي ملاتړ” ته دوام ورکړي او له پاکستانه د هغوی د شړلو ګواښ عملي نهکړي.
دغه سازمان ویلي، چې په افغانستان کې به دغه کډوال د طالبانو له ځورونې سره مخامخ شي.
نور ولولئ: د طالبانو ویاند پاکستان کې له افغان کډوالو سره چلند د نه زغم وړ بولي
د سویلي اسیا په چارو کې د بښنې نړۍوال سازمان یوې مشرې نادیه رحمان ویلي، دغه سازمان د پاکستان له حکومته غواړي افغان کډوالو ته اجازه ورکړي، چې د اېستلو له وېرې پرته په برم او عزت سره په پاکستان کې ژوند وکړي.
د ملګرو ملتونو له عالي کمېشنرې غوښتنه
دغه سازمان یو ځل بیا د کډوالو په چارو کې د ملګرو ملتونو له عالي کمېشنرۍ غوښتي، چې په پاکستان کې د پناه غوښتونکو افغانانو د غوښتنلیکونو د ثبت او ارزونې بهیر چټک کړي.
نوموړې زیاته کړه: “نړۍواله ټولنه باید ژر تر ژره په افغانستان کې د هغو کسانو چې د طالبانو د ځورونې له امله تښتي، خپلې ژمنې پوره کړي.”
دغه سازمان ویلي، په پاکستان کې له ۳.۷ میلیونو ډېر افغانان ژوند کوي چې ډېری یې ثبت شوي نه دي.
د کډوالو په چارو کې د ملګرو ملتونو عالي کمېشنرۍ د سه شنبې په ورځ وویل، چې په پاکستان کې مېشتو افغان کډوالو ته باید اجازه ورکړل شي چې په خپله خوښه له دې هېواده ووځي.
د افغان کډوالو ایستل د اندېښنې وړ دي
د دغه سازمان ویاند قیصرخان افریدي له پاکستانه د افغان کډوالو د اېستلو پلان د اندېښنې وړ بللی او ویلي یې دي، چې ملګري ملتونه د دغه هېواد د حکومت د نوې پرېکړې په تړاو له اړوندو پاکستاني بنسټونو د لا زیاتو توضیحاتو غوښتونکي دي.
نور ولولئ: طالبان نور چاته خپلسرې سزاګانې نه شي ورکولی
په دې وروستیو کې د پاکستان د بشري حقونو خپلواک کمېسیون هم د دغه هېواد د حکومت پر پرېکړې غبرګون ښودلی او د دې پرېکړې د ژر تر ژره لغوه کېدو غوښتنه یې کړې ده.
دغه کمیسیون ویلي، له ترهکرو ډلو سره د تړاو له امله له یو میلیون څخه د زیاتو کډوالو اېستل د پاکستان د ملي امنیت په اړه د لنډ او محدود نظر ښکارندویي کوي.
طالب چارواکو هم د پاکستان د دې پرېکړې په اړه غبرګون ښودلی او هغه یې د نه منلو وړ بللې.