طالبانو د ښځو پر زده کړو بندیزونه لګولي، نو ښځینه ډاکټرانې به له کومه شي او دا ستونزه به پاتې وي
د طالبانو د روغتیا وزیر تېره ورځ ویلې چې په افغانستان کې ښځینه ډاکټرانې کمې دي او په ولایتونو کې سم خدمات نه ترسره کېږي.
نور ولولئ: امریکايي سفیرې د طالبانو پر وړاندې د نړۍ هېوادونه یو والي ته راوبلل
د عامې روغتیا وزیر قلندر عباد وايي چې د افغانستان په ټولو ولایتونو کې د ښځینه ډاکترانو شمېر کم دی.
ښاغلي عباد، چې اروزګان ولایت ته تللی و، په یوه خبري غونډه کې وویل، د افغانستان په ټولو ولایتونو کې د ښځینه ډاکترانو شمېر لږ دی.
د ښځینه ډاکټر شمېر په نشت حساب دی
اروزګان، پکتیکا او زابل په ځانګړي ډول هغه ولایتونه دي چې د ښځینه ډاکترانو، نرسانو، او قابلو شمېر پکې په نشت حساب دی.
د عامې روغتیا وزیر، چې د نجونو د تعلیم پر ارزښت پوهیږي، همداراز وویل:«د عامې روغتیا وزارت په پام کې لري چې د افغانستان د ښځینه ډاکترانو د کموالي ستونزه حل کړي او له همدې کبله یې ۲۰۰ ښځینه کارکوونکې د لوړتخصص پروګرام ته معرفي کړي دي.»
ده زیاته کړه:«اسلامي امارت په تېرو دوو کلونو کې هم په افغانستان کې د نرسانو او قابلو د روزنې په برخه کې ډېر پروګرامونه اجرا کړي دي.»
د ښځیو د تړل کېدو په اړه چوپتیا
ښاغلي قلندر په دې اړه څه ونه ویل چې که د نجونو ښوونځي بند وي نو څنګه به نور ښځینه روغتیايي کدرونه روزل کېږي.
د ډېرو نظرخاوندانو په باور طالبانو د نجونو د تعلیم په مخنیوي افغانستان ته داسې ګوزار ورکړی چې جبران یې ډیرو کلونو ته اړتیا لري.
نور ولولئ: حامد کرزی: افغانستان کې باید نجونو ته د زدهکړو حق ورکړل شي
د طالبانو اکثره غړي د نجونو د تعلیم او د ښځو د کار پلویتوب کوي خو د دوی په منځ کې د دنیا له چارو یو شمېر بې خبره ملایان اجازه نه ورکوي چې نجونې تعلیم وکړي او افغانستان په پښو ودریږي.
طالبانو د دویم ځل واک ته له رسېدو سره سم د ښځو او نجونو پر مخ د ښوونځیو او پوهنتونو دروازې وتړلې. دوی د حجاب د نه مراعتولو او ناسم شرایط ددې بهانه ګرځولي چې د نجونو پر مخ د زده کړو دروازې وتړي.
په دې برخه کې نړیوالو سازمانونو او په کور دننه سیاسي څېرو په بار، بار د ښوونځیو او پوهنتونونو د خلاصون غوښتنه کړې، خو طالبان بې له کوم موجه دلیل د ښځو پر وړاندې د زده کړو او کار دروازې تړلي دي.
