هغه څوک چې د لمبو وهلو سپورټ کوي، تر نورو غوره او ښه روغتیايي وضعیت لري
د لمبو وهلو تمرین د نورو تمرینونو په پرتله بدن ته ډېره ګټه رسوي. د لمبو وهلو تمرین زموږ بدن او دماغ فعالیتونه ګړندي کوي او ګټه ورسوي.
لامبو وهل هغه سپورټ دی چې زموږ د بدن ټولو برخو لپاره ګټور دی او تر نورو سپورتي فعالیتونو غوره دی، دا د وینې رګونو فعالیت او زموږ حافظه ښه کوي او د اوږده سالم ژوند لامل کېږي.
خو لامبو د کومو دلیلونو له امله تر نورو دومره ګټور ورزش دی؟
لامبو وهل د وینې رګونه ډېر نرموي
د بي بي سي د علمي پروګرامونو مشهور وړاندې کوونکی ډاکټر مایکل موسلي وايي: “کله چې تاسو سخته لامبو وهئ، تاسو په خپل بدن کې د عضلاتو څو ګروپونه کاروئ، او تر ټولو مهم دا چې تاسو د اوبو د وزن او ځواک پر وړاندې کار کوئ.”
نور ولولئ: باډي بیولډینګ یا وزن پورته کول ستاسو بدن ته څه ګټې لري؟
نور ولولئ: په ښه خوب کولو کې د تمرین رول
د لامبو وهلو یو له روغتیایي ګټو، زموږ د بدن د وینې پر رګونو اغېزه ده. د وینې رګونه زموږ په بدن کې خورا مهم دي. د زړه ډېری ناروغۍ د وینې رګونو د بندېدو له امله رامنځته کېږي، نه د زړه ناروغۍ له امله. د وینې رګونه نه یوازې د بدن مختلفو برخو ته وینه لېږدوي، بلکې د نرمښت او پراخېدو سره، کولای شي د زړه د ټکان له امله رامنځته شوی حرکت متوازن کړي. دا فعالیت زموږ په روغتیا کې مهم رول لوبوي. د وخت په تېرېدو سره، د وینې رګونه سختېږي، چې په پایله کې دماغ او پښتورګو ته زیان رسوي.
په یوه تجربه کې چې د ټیکساس د اسټین پوهنتون پروفیسور هیرو تاناکا لخوا ترسره شوې، هغه موندلې چې یوازې د لامبو درې میاشتني تمرین پروګرام د وینې رګونو بندیدو (ارټیریوسکلروسیس) په کمولو کې اغېز لري او پدې توګه د بدن د داخلي ارګانونو فشار کموي.
لامبو وهل د عمر اوږدېدو لامل کېږي
دا د حیرانتیا خبره نده چې د وینې پر رګونو د لامبو وهلو مثبت اغېز د اوږد عمر لامل کېږي. د امریکا د سویلي کارولینا پوهنتون ساینس پوهانو په اوسط ډول ۱۳ کاله د ۲۰ او ۹۰ کلونو ترمنځ تر ۴۰ زره ډېر نارینه وڅارل او یې وموندله، هغه خلک چې لامبو وهي د مړینې کچه یې د هغو خلکو پرتله ټیټه ده چې ورزش نه کوي.
همدارنګه، هغه خلک چې لامبو وهي د هغو پرتله چې منډې وهي یا پلی تګ کوي د ناروغۍ له امله د مړینې احتمال یې ۵۰ سلنه کم دی. هر ډول تمرین چې په وچه ځمکه کې ترسره کېږي د وینې رګونو د سختوالي او بندېدو په کمولو کې لږ اغېز لري.
