د هندوستان غوره ليګ سياليو په لړ کې تېره ورځ دوه لوبې ترسره شوې چې په لومړۍ لوبه کې رويل جلنجرز بنګلور لوبډلې راجستان رويلس لوبډلې ته ماتې ورکړه او په دويمه لوبه کې چينای سوپر کينګ لوبډلې کلکتې نايټ رايډرز لوبډلې له ماتې سره مخ کړه
د تېرې ورځې د لومړۍ لوبې پچه د راجستان رويلس لوبډلې لوبډلمشر سنجو سمسون وګټله او لومړی يې د توپ اچونې پرېکړه وکړه.
د آی پي اېل سياليو په ۳۱ مه لوبه کې رويل جلنجرز بنګلور لوبډلې لومړی توپ وهنه وکړه چې د دوی له لوبډلې ګلين مکسويل، فاف ډوپليسېس او ډېنېش کارټيک ښه توپ وهنه وکړه. مکسويل ۷۷ منډې، ډوپليسېس ۶۲ او کارټيک ۱۶ منډې جوړې کړې. بنګلور لوبډلې د ټولو اورونو په لوبولو سره خپل ۹ لوبغاړي له لاسه ورکړل او ۱۸۹ منډې يې جوړې کړې چې سيالې لوبډلې ته يې د ۱۹۰ منډو هدف وټاکه.
د راجستان رويلس لوبډلې له لوري ټرينټ بولټ، سنډيپ شرما او يزوېنډرا چهال ښه توپ اچونه وکړه. بولټ او شرما دوه-دوه ويکټې او چهال يوه ويکټ ترلاسه کړه.
د راجستان رويلس لوبډلې په ځواب کې ۱۸۲ منډې جوړې کړې او لوبه يې د ۷ منډو په توپير وبايلله. د راجستان په لوبډله کې ډېوډټ پاډيکال، يشاسوي جيسوال او ډرو جورل ښه توپ وهنه وکړه.
د آی پي اېل سياليو په ۳۲ مه لوبه کې چينای سوپر کينګ لوبډلې کلکتې نايټ رايډرز لوبډلې ته ماتې ورکړه
د نوموړې لوبې پچه د کلکتې لوبډلې لوبډلمشر نېټېش رنا وګټله او لومړی يې توپ اچونې پرېکړه وکړه.
د چينای لوبډلې د اجينکيا رهاني، ډېون کانوې او شېوام ډوب په ښې توپ وهنې سره د ۴ لوبغاړو له سوزيدو وروسته ۲۳۵ منډې جوړې کړې. رهاني ۷۱ منډې، کانوې ۵۶ او ډوب ۵۰ منډې وکړې.
د چينای سوپر کينګ لوبډلې په ځواب کې کلکتې نايټ رايډرز لوبډلې ۱۸۶ منډې وکړې او لوبه يې د ۴۹ منډو په توپير وبايلله. د کلکتې لوبډلې له لوري جسون روی، رينکو سينګ او لوبډلمشر نېټېش رنا ښه توپ وهنه وکړه خو ونه توانېدل ټاکلی شوی هدف پوره کړي.
د نن لوبې له حاله هم خبر شئ
د هندوستان غوره ليګ سياليو په لړ کې نن يوه لوبه ترسره کيږي چې سنرايزرس حيدرآباد لوبډله له ډهلي کپيټلس لوبډلې سره لوبه کوي.
