روسی ډیپلوماټ تینګار کوي چې په افغانستان کې د امریکا او ناټو جنګي جنایتونه باید وڅېړل شي
د ملګرو ملتونو د بشري حقونو په شورا کې د روسیې ډیپلوماتیک ماموریت ټینګار کړی چې په افغانستان کې د امریکا او ناټو د جنګي جنایتونو په اړه د معلوماتو راټولول باید لومړیتوب ولري. خو دا کېدلی شي چې د مسکو او واشنګټن تر منځ ډيپلوماټیک فشار وي چې په یوه او بل یې لګوي. د شنونکو په باور تر ننه هم افغانان د شوروي اتحاد پر بمونو وژل کېږي او د هغه د تېري له امله لا هم افغانان بیه پرې کوي او هېواد یې ناارامه دی.
روسي ديپلومات “يروسلاو ياريمين” د ملګرو ملتونو د بشري حقونو د شورا په غونډه کې وويل: “نړيواله ټولنه بايد په افغانستان کې د امريکا او ناټو پوځيانو د خپل شل کلن شتون په ترڅ کې د جنګي جرمونو يادونه وکړي.”
نور ولولئ: له افغانستان نه د وګړو ایستلو کې د بریتانیا پر خارجه وزارت د بې پروګرامۍ او ګډوډۍ تورونه لګیدلی
هغه زیاته کړه: “په کار ده چې د معلوماتو د راټولولو او په افغانستان کې د امریکا او ناټو د جنایتونو د افشا کولو او د هغوی د افشا کولو لپاره کار ته دوام ورکړو.”
د بشري مرستو سیاسي کول
دغه روسي ديپلومات وويل: د افغانستان خلکو ته د بشري مرستو د سياسي کولو او د ځينو ژمنو له عملي کولو سره د تړلو لپاره د امريکا او د هغې د متحدينو هڅې د منلو وړ نه دي.
یاریومین یادونه وکړه، «په افغانستان کې د ثبات او امنیت اسانتیا د روسیې لومړیتوب دی
افغانستان او د اوږدمهاله سولې په اړه د مسکو نظر
دغه روسي دیپلومات ویلي، مسکو ډاډمن دی، چې په افغانستان کې اوږدمهاله سوله به د ټولې سیمې د ښه پرمختګ لامل شي.
د روسیې د بهرنیو چارو د وزارت ویاندې “ماریا زاخارووا” هم د روان کال په اپریل میاشت کې ویلي وو چې د جرمونو نړیواله محکمه (هیګ) د امریکا اطاعت کوي او له همدې امله یې په افغانستان او عراق کې د امریکا او ناټو د جرمونو له څیړلو څخه ډډه وکړه.
شنونکي ورته غوښتنې د امریکا او مخالفانو ترمنځ یې دیپلوماتیکه جګړه بولي او وایي، چې په دې ډول افغانستان د خپلو لوبو په مرکز لا نور بدلول غواړي.
روسیه خپله هم پر افغانستان د تېري پر مهال په پراخو جنګي جنایتونو تورنه ده، خو تر اوسه نه د ملګرو ملتونو امنیت شورا او نه هم نړیوالې محکمې ددغو جنګي جنایتونو په څېړلو کې کومه علاقه ښودلي ده.
