سایبورګ ګړندۍ؛ د کنډوالو لاندې د ټپیانو د ژغورلو نوې ټکنالوژي
د استرالیا د کوینزلنډ پوهنتون او د نیو ساوت وېلز پوهنتون څېړونکو داسې سایبورګ ګړندۍ جوړه کړې چې د نړېدلو ودانیو او نورو سختو سیمو لاندې د بند پاتې کسانو په موندلو او د لومړنیو درملو په رسولو کې مرسته کولی شي.
څېړونکو د شمالي کوینزلنډ له لویې ځمککیندونکې ګړندۍ (Macropanesthia rhinoceros) څخه کار اخیستی او پر هغې یې کوچني برېښنايي وسایل، کامره او د درملو د تزریق ځانګړی سیستم نصب کړی دی. سایبورګ ګړندۍ له لرې کنټرولېږي او د انسان د لاسرسي له سختو سیمو څخه تېرېدای شي.
سایبورګ ګړندۍ څنګه کار کوي؟
د څېړونکو په طرحه کې د ګړندۍ پر بدن یو سپک سیستم نصب شوی چې د هغې حرکت له لرې کنټرولوي. کامره د کنډوالو په منځ کې د وضعیت د لیدلو لپاره کارېږي، په داسې حال کې چې د تزریق سیستم کولی شي هدف ته مایع درمل ورسوي.
د سایبورګ ګړندۍ مهمه ځانګړنه دا ده چې د عادي کوچنیو روبوټونو پر ځای له ژوندي حشرې څخه د حرکت طبیعي وړتیا اخیستل کېږي. دا حشره د تنګو ځایونو، خنډونو او ناهموارو سطحو د تېرېدو وړتیا لري.
د درملو رسولو ازموینه
څېړونکو په لابراتواري ازموینو کې د دې ټکنالوژۍ د درملو رسولو وړتیا وازمویله.
د نږدې واټن له هدف سره د تزریق بریا تر ۹۵ سلنې رسېدلې، په داسې حال کې چې د هدف موندلو، دقیق موقعیت نیولو او تزریق بشپړ بهیر په ۷۲ سلنه ازموینو کې بریالی و.
د دې پایلو له مخې، سایبورګ ګړندۍ لا د عملي ژغورنې بشپړه وسیله نه ده، خو څېړونکي یې د راتلونکو بیړنیو عملیاتو لپاره یوه احتمالي ټکنالوژي بولي.
د ژغورنې راتلونکی
د څېړونکو اوږدمهاله طرحه دا ده چې د سایبورګ ګړندۍ یوه ډله په ګډه وکارول شي. ځینې به کامرې او حسګرونه ولري، ځینې به د چاپېریال معلومات راټولوي او نورې به د طبي وسایلو د انتقال لپاره کارول کېږي.
څېړونکي وايي، هدف دا نه دی چې سایبورګ ګړندۍ د ژغورنې ډلې ځای ونیسي؛ بلکې غواړي ژغورونکو ته داسې وسیله ورکړي چې هغو سیمو ته ورسېږي چې انسانانو ته خطرناکې یا ډېرې تنګې وي.
د څېړنې د ډلې په اټکل، که نورې ازموینې او د ساحې آزموینې بریالۍ شي، ښايي په راتلونکو ۵ تر ۱۰ کلونو کې دا ډول سایبورګ حشرات په واقعي بیړنیو عملیاتو کې وکارول شي.
په دې توګه، سایبورګ ګړندۍ لا یوه بشپړه طبي وسیله نه ده، خو د حشراتو طبیعي حرکتي وړتیا له کوچنۍ ټکنالوژۍ سره یوځای کوي او د زلزلو، نړېدلو ودانیو او نورو ناورینونو پر مهال د ژغورنې لپاره نوې لاره وړاندې کوي.
