طالبانو ۴ ستر کانونه په قرارداد ورکړل
![mines2](https://afghannow.net/wp-content/uploads/2024/01/Mines2-780x470.jpg)
د کانونو او پټرولیم وزارت دغه څلور کانونه د څه باندې ۱۰ میلیارده افغانیو په ارزښت ورکړي دي
د کانونو او پټرولیم وزارت مسوولانو نن «پنجشنبه، مرغومې ۲۱مه» له یوشمېر خصوصي شرکتونو سره د څلور سترو کانونو د استخراج او پروسس قراردادونه لاسلیک کړل.
له دغو څلورو کانونو څخه یو یې د هرات د کرُخ ولسوالي «مسجد چوبي» سیمه کې د ۱.۶ کیلومتر مربع په مساحت سره د ډبرو سکرو کان دی چې تړون یې د ۳۰ کلونو لپاره حضرت بلال خالد شرکت سره لاسلیک شوی دی.
دغه شرکت څه ډول خدمات وړاندې کوي؟
ټاکل شوې قراردادي شرکت دغه کان کې څه باندې ۱۵۱ میلیونه افغانۍ پانګونه وکړي او حکومت به د دغه کان له هر ټُن څخه ۲۲۰۰ افغانۍ ګټه ترلاسه کړي او د سیمې خلکو ته به د پنځه میلیونه افغانیو په ارزښت ټولنیز خدمات وړاندې شي.
د بغلان د دوشي ولسوالي «قرهزغن» سیمه کې د ۵.۳۳ کیلومتر مربع په مساحت سره د سرو زرو کان د استخراج او پروسس چارې د مدثر اشنا او باختر یونین شرکتونو سره د ۳۰ کلونو لپاره لاسلیک شوی دی.
نور ولولئ: د افغانستان سرپل ولایت کې هره ورځ د ۹۰۰ټنه نفتو استخراج
نور ولولئ: د امو نفتي حوزې د ۸ څاګانو استخراج پیل شو
نور ولولئ: د افغانستان کانونه؛ قراردادونه یې شفاف او استخراج یې مسلکي نه دی
قراردادي شرکتونه به دغه کان کې شاوخوا ۱۲۴ میلیونه افغانۍ پانګونه وکړي او ۵۵سلنه ګټه به یې دولت ته ورسېږي.
د ۱۶.۸۱ کیلومترو په مساحت سره د هرات د پښتونزرغون ولسوالي د اوسپنې کان قرارداد هم د ۳۰ کلونو لپاره له «همګرایان غرب» شرکت سره لاسلیک شوی دی.
![mines](https://afghannow.net/wp-content/uploads/2024/01/Mines-300x170.png)
دغه شرکت به یاد کان کې د څه باندې ۱۴۰میلیونه ډالرو په ارزښت پانګونه کوي چې ۲۰سلنه ونډه یې د حکومت اړوند ده او د سیمې خلکو ته به د ۵ میلیونه افغانیو په ارزښت ټولنیز خدمات وړاندې شي.
خصوصي شرکتونه په اکثرو قانونو کې مصروف دي
د ۴.۷۱ کیلومتر مربع په مساحت سره د پروان ولایت د کوهصافي د کرومایتو کان قرارداد هم د پنځو کلونو لپاره علیمشاه بابا او جاوید نیازي شرکتونو سره لاسلیک شو.
قراردادي شرکتونه به دغه کان کې څه باندې ۱۸۰ میلیون افغانۍ پانګونه وکړي او له هر ټن محصول څخه به د حکومت ګټه ۱۱ زره او ۳۰۰ افغانۍ وي او د پلور ۳ سلنه به یې د سیمې خلکو ته د ټولنیزو خدماتو په وړاندې کولو ولګول شي.
د کانون او پترولیم وزارت سرپرست شهابالدین دلاور وویل، په ټوله کې به خصوصي شرکتونه په دغو څلورو کانونو کې څه باندې ۱۰ میلیارد او ۱۵۰ میلیون افغانۍ پانګونه وکړي.
په ورته وخت کې د یوشمېر خصوصي شرکتونو مسوولان وايي، کانونو په پانګونې سره به هېواد کې ګڼ شمېر کسانو ته د کار زمینه برابره شي.