طالبان:کابل کې د ظواهري د حضور په اړه هیڅ معلومات نه لري

افغان طالبانو ویلي، افغانستان ته د القاعدې شبکې د وژل شوي مشر ایمن الظواهري له ورتګ او هلته د نوموړي د اوسېدو په اړه هېڅ مالومات نه لري. د امریکا ولسمشر جو بایډن درې ورځې وړاندې اعلان وکړ چې ایمن الظواهري یې افغان پلازمېنه کابل کې په یوه ډرون برید کې وژلی دی.

خو طالبانو له درې ورځني سکوت وروسته او په خپل رسمي غبرګون کې ویلي، د امریکا د ولسمشر د دې ادعا په اړه مالومات نه لري.‌ د طالبانو په اعلامیه کې راغلي چې د دې ډلې کشفي او استخباراتي ارګانونو ته سپارښتنه شوې ده چې د قضیې د ټولو اړخونو په اړه جدي پلټنې وکړي. طالبانو همدا راز ویلي، د افغانستان پر خاوره د امریکا ډرون برید له دوحې تړونه سرغړونه ده او که بیا دا ډول پېښې تکرار شي نو د هر ډول پایلو مسؤلیت به یې د امریکا پر غاړه وي.‌

د یادونې ده چې طالبانو تېره دوشنبه ناوخته ومنله چې امریکا د کابل ښار په شېرپور سیمه کې پر یوه کور ډرون برید کړی دی، خو دوی (طالبان) نه پوهېږي چې د برید هدف څوک و. څو ساعته وروسته د امریکا ګڼو رسنیو خبر ورکړ چې په هغه برید کې (چې د تېرې یکشنبې پر سهار شوی و) د القاعده شبکې مشر ایمن الظواهري وژل شوی دی.‌

نور یی ولوله | د امریکا او قطر د باندنیو چارو وزیران په کمبوډیا کې د افغانستان په اړه خبرې کړي

نور یی ولوله | انس حقاني وایي، د نجونو ښوونځی به دایم نه وي تړلي او ژر به پرانستل شي

ورپسې د امریکا ولسمشر بایډین هم سپینه ماڼۍ کې د رسنیو پر وړاندې راڅرګند شو او په دې برید کې د الظواهري د وژنې دعوه یې وکړه. د الظواهري د وژلو غبرګونونو کې د افغان سولې لپاره د امريکا پخواني ځانګړي استازي زلمي خليلزاد ویلي، دا شونتيا شته چې په طالبانو کې دې ځينو عناصرو له امريکا سره د القاعدې د مشر ايمن الظواهري په وژنه کې مرسته کړې وي.

د کابل شېر پور سیمه کې هغه کور چې باور کېږي ایمن الظواهري پکې وژل شوی. نوموړي چې د امریکا له ملي راډيو سره (اېن پي ار) سره خبرې کولې وويل، داسې احتمال شته چې د حقاني شبکې په ګډون يو شمېر طالب چارواکي په کابل کې د القاعدې د مشر ايمن الظواهري له شتون څخه خبر وي خو د نوموړي په خبره د دې ډلې ټول مشرتابه ممکن په دې نه و خبر.