د طالبانو ویاند ذبیح الله مجاهد د ځینې افغان خبریالانو هغو تورونو ته چې وايي د زور له لارې د دوی یوه خبري غونډه لغوه شوې، ویلي، رسنۍ باید ‘د قانون په چوکاټ کې سالم فعالیت ‘ وکړي.د یادونې ده، چې د افغان خبریالانو فدراسیون له دې مخکې ادعا وکړه، چې د جنورۍ پر ۲۶ مه یې په افغانستان کې د رسنیو او خبریالانو پر وضعیت، معلوماتو ته د لاسرسي او له خبریالانو سره د زور زیاتي پر موضوع یوه خبري غونډه رابللې وه، چې طالبانو ‘ګډوډه کړه ‘ دوی یې ‘وګواښل ‘ او د فدراسیون پر مسوولینو یې فشار راوړ.
د یو خبري اژانس په رپوټ کې د افغانستان ژورناليستانو ملي اتحادیې رئیس میرعلي اصغر اکبرزاده له قوله ویل شوي، د دوی د خبرې غونډې د پوښښ لپاره کورنۍ او بهرنۍ رسنۍ راغلې وې، خو دغه ناسته د شفاهي هدایت له مخې لغوه شوه. د ښاغلي مجاهد په ټویټر پیغامونو کې بیا په مستقیم ډول د دې تورونو یادونه نه ده شوې، خو په وینا یې هغه رسنۍ چې غواړي په ‘عادي ‘ ډول فعالیت وکړي، ”باید باید خپل پای ته رسېدلي جوازونه بېرته تمدید کړي، پاتې مالیې ورکړي او د رسنیو د قانون په چوکاټ کې په رښتوني او سالم ډول رسنیز فعالیت ولري. ”
نور یی ولوله | پیسته د موسمي ناروغیو ترڅنګ نورې ګټې هم لري
په افغانستان کې د ملګرو ملتونو استازولۍ دفتر یوناما په یوه ټویټر پیغام کې د خبریالانو غونډې لغوه کول د بیان پر ازادۍ د محدویت لګول بللي دي. د یوناما په یوه ټویټر پیغام کې ویل شوي، له طالبانو غوښتل شوي چې ”د هغو افغانانو خولې پټولو هڅې پر ځای چې دوی فکر کوي، مخالف نظر لري، باید د افغانانو تر منځ د خبرو ملاتړ وکړي. ” د رسنیو پراخ فعالیت او ازادي په تېرو شلو کالو کې افغانستان کې یو مهم پرمختګ او لویه لاسته راوړنه بلل کېږي.
په افغانستان کې د طالبانو له واکمنېدو سره په دې هېواد کې د رسنیو د ازادۍ په اړه اندېښنې ډېرې شوې دي. یو شمېر ځایي رسنیو بي بي سي ته ویلي، په هغه ډول چې پکار ده خپل رسنیز مسؤلیت نشي ترسره کولی او د طالبانو لخوا تر فشارونو لاندې دي. خو طالبانو دا تورونه رد کړي او وایي، رسنۍ په ازادۍ سره خپلې چارې ترسره کولی شي او مالوماتو ته هم لاسرسی لري.
