اړوند خبر:
ننګرهار کې د خلکو له خوا نیول شوی ژوی بېرته خوشی شو
په داسې حال کې چې طالبانو افغانستان کې د وحشي ژوو د ښکار او قاچاق پر ضد ملي کمپاین پیل کړی، د غزني ولایت مسوولینو اعلان کړی چې د دغه ولایت د جغتو ولسوالۍ په تلخک کلي کې یې د هوسۍ یو بچی له یو کور څخه ژغورلی دی.
د غزني د چاپېریالساتنې ریاست وایي، دا عملیات د دوی د منسوبینو او د استخباراتو ریاست د کارکوونکو په ګډه همکارۍ د جوزا په ۴مه (مې ۲۶مه) ترسره شوي. یاد هوسۍ بچی په ناقانونه توګه د علي محمد داوان په نوم یو تن په خپل کور کې ساته، چې وروسته له ژغورل کېدو، د ساتنې او روزنې لپاره کابل ته ولېږدول شو.
د چاپېریالساتنې ریاست وايي، دغه هوسۍ بچی د “کوچنیو حیواناتو د ساتنې” موسسې ته وسپارل شو، څو تر روغتیايي پاملرنې او طبیعي شرایطو ته د عادتېدو وروسته، بېرته طبیعت ته راخوشې شي. چارواکي ټینګار کوي چې د دا ډول ژوو ناقانونه ساتل، نه یوازې د طبیعي ایکوسیستم پر توازن ناوړه اغېز لري، بلکې د قانون خلاف عمل هم دی.
د ریاست الوزرا د هدایت پر بنسټ، اوسمهال په ټول هېواد کې د وحشي حیواناتو، مرغانو او کبانو پر ښکار او قاچاق بندیز لګېدلی دی. مسوولین وايي، هر څوک چې د دغو حیواناتو په ښکار یا غیرقانوني ساتنه کې ښکیل وي، قانوني سزا به وویني.
د طبیعت او وحشي ژوو د دفاع برخې کارپوهان دا اقدام ستایي او وایي، دا ډول ژونديو موجوداتو ژغورنې نه یوازې د حیواناتو د نسل د ساتنې لپاره مهمې دي، بلکې د ټولنې د چاپېریالي پوهاوي یوه مهمه برخه هم جوړوي.
دوی زیاتوي چې افغانستان، که څه هم له کلونو جګړو زیانمن شوی، لا هم یو ځانګړی طبیعي تنوع لري، چې د وحشي ژوو نسلونه یې باید وساتل شي. د هغوی په وینا، هر ژغورل شوی ژوی، د یوه نسل د ژغورنې یوه هیلې بښونکي نښه ده.
راپورونه ښيي چې په وروستیو کلونو کې د ښکار، وچکالۍ او د طبعي مېشت ځایونو د تخریب له امله، د هوسۍ، غیږو، لېمو او یو شمېر نادرو مرغانو شمېر په هېواد کې کم شوی دی. مسوولین هیله لري چې د قانون تطبیق او د عامو خلکو پوهاوی به د دې بهیر مخه ونیسي.
