د لوی اختر له رارسېدو مخکې له زندانونو د بندیانو ازادېدل پیل شوي او د هېواد له بېلابېلو زندانونو څخه څه باندې ۱۱ سوه تنه خوشې شوي دي.
د زندانونو چارو د تنظیم ادارې ویلي، د سترې محکمې له منظورۍ وروسته ۱۱ سوه ۹۱ تنه زندانیان، توقیفیان او محجوزین خوشې شوي دي. د یادې ادارې په وینا، دغه کسان د “راڼه بهیر” له مخې ازاد شوي، څو وکولای شي د لوی اختر ورځې له خپلو کورنیو او دوستانو سره تېرې کړي.
د خوشې کېدو بهیر څنګه ترسره شوی؟
د زندانونو چارو ادارې ویلي، له زندانونو د بندیانو ازادېدل د قانوني ارزونو او د سترې محکمې له منظورۍ وروسته ترسره شوي دي. د ادارې په وینا، د خوشې شویو کسانو دوسیې ارزول شوې او له قانوني پړاوونو تر تېرېدو وروسته ازاد شوي دي.
تر اوسه دا نه ده څرګنده شوې چې په خوشې شویو کسانو کې ښځې او ماشومان هم شامل دي که نه، خو مسؤلین وایي، د خوشې کېدو لړۍ د ټاکلو اصولو له مخې عملي شوې ده.
د اختر په مناسبت د بندیانو خوشې کېدل
له زندانونو د بندیانو ازادېدل هر کال د کوچني او لوی اختر په مناسبت ترسره کېږي. ډېری کورنۍ دا اقدام مثبت بولي او وایي، د اختر په ورځو کې د خپلو عزیزانو بېرته ستنېدل د خوښۍ او ارامتیا لامل کېږي.
د ځینو خوشې شویو کسانو خپلوان هم وایي، دا ډول پرېکړې د کورنیو پر رواني وضعیت ښه اغېز کوي او بندیانو ته د عادي ژوند د بېرته پیل فرصت برابروي.
د زندانونو د ارزونې روانه لړۍ
د یادونې وړ ده چې د هېواد په بېلابېلو زندانونو کې د بندیانو د دوسیو د ارزونې لړۍ وخت ناوخت دوام لري. مسؤلین وایي، له زندانونو د بندیانو ازادېدل د همدې ارزونو او قانوني پرېکړو له مخې عملي کېږي.
