د ریاست الوزراء سیاسي مرستیا مولوي کبیر وايي چې طالبان پر ډیالوګ یا خبرو اترو باور لري
له هغې وروسته چې طالبانو د دوحې په غونډه ګډون ونه کړ او هغه یې «ګټوره» ونه بلله، د طالبانو د رییسالوزرا سیاسي مرستیال په کابل کې د جاپان له سفیر سره په کتنه کې ویلي چې په ډیالوګ باور لري.
ارګ سهشنبه د کب پر لومړۍ د یوې خبرپاڼې په خپرولو د طالبانو د ریاستالوزرا سیاسي مرستیال مولوي عبدالکبیر او په کابل کې د جاپان سفیر تاکایوشي کورومیا ترمنځ د کتنې خبر ورکړی دی.
مولوي عبدالکبیر زیاته کړې چې طالبان په ډیالوګ باورمند دي او غواړي هره مساله د خبرو اترو له لارې حل شي.
د خبرو له لارې د شته اندېښنو لرې کول
نوموړي زیاته کړې چې د ټولو هېوادونو اندېښنو ته «درناوی» لري او چمتو دي چې د خبرو له لارې یې اندېښنې ځواب کړي.
دا په داسې حال کې ده چې ملګرو ملتونو د دوحې په غونډه طالبانو ته د ګډون بلنه ورکړه؛ خو له ورتګه یې ډډه وکړه.
نور ولولئ: تادامیچي: طالبان باید د نجونو د زدهکړو او ټولشمولیت په اړه رښتینی فکر وکړي
نور ولولئ: د دوحې په غونډه کې محبوبه سراج وايي، طالبان ښځو ته سپکاوی کوي
نور ولولئ: طالبان د دوحې ناستې له اجنډا خبر نه لري
بلخوا، پرون د ملګرو ملتونو سرمنشي انتونیو ګوتېرېش د دوحې غونډې په پای کې یوې خبري ناستې ته وویل چې طالبانو په دې غونډه کې د ګډون لپاره په یو لیک کې داسې غوښتنې ترې کړې وې چې په خبره یې، د افغانانو له نورو استازو سره یې د ملګرو ملتونو د خبرو اترو حق تر پښو لاندې کاوه.
د دوحې په غونډه کې له افغان مدني ټولنو د طالبانو تېښته
د دوحې په ناسته کې د افغانستان مدني ټولنو رسنیو ته وویل چې طالبان د مدني ټولنو له پنځو استازو سره نه شي مخامخ کېدلی، ځکه د افغانستان د ښځو او مدني ټولنو لخوا پر طالبانو د فشارونو راوړلو له امله کېدای شوه چې دغه ډله د نړیوالو پر وړاندې وټکوي، خو طالبانو بیا ګډون ونه کړ.
اخوا د ملګرو ملتونو ویل چې طالبانو نه غوښتل چې نور افغانان په غونډه کې ګډون وکړي چې دا کار بیا ملګرو ملتونو ته د منلو نه و، ځکه داد ملګرو ملتونو له منشور او اصولو سره په ټکر کې و.
د طالبانو د بهرنیو چارو سرپرست وزیر امیرخان متقي لا له وړاندې ویلي و چې دغه ډله به د دوحې په ناسته کې ماناداره ګډون کوي، خو دا یې په ډاګه کړي نه وه چې دوی څه ډول مناداره ګډون غواړي او کوم شرطونه یې وړاندې کړي وو؟
