متقي دوحه کې د یو شمېر هېوادونو له استازو غوښتي چې له کابل ماموریت ترسره کړئ
د طالبانو بهرنیو چارو سرپرست وزیر قطر کې د یو شمېر هېوادونو له استازو غوښتي چې کابل کې سفارتونه پرانیزئ
په دې ناسته کې د امریکا، برتانیا، هسپانیا، سویلي کوریا، هالنډ، ایټالیا، استرالیا او کاناډا استازو ګډون کړی و.
د دغه وزارت په اعلامیه کې راغلي چې “ښاغلي متقي او ورسره پلاوي د مختلفو هېوادونو سفیرانو پوښتنو او اندېښنو ته په تفصیل سره ځواب ووایه او زیاته یې کړه چې دغه نمایندګۍ د دې پر ځای چې له لیرې څخه د افغانستان لپاره خپل ماموریت پر مخ یوسي، باید په افغانستان کې وجود ولري او د افغانستان اوسني واقعیتونه له نژدې مشاهده کړي.”
د طالبانو له واکمنېدو وروسته سفارتونه تړل شوي
د یادونې ده چې د امریکا و بریتانیا په ګډون ګڼو هېوادونو نږدې دوه کاله وړاندې پر افغانستان د طالبانو له بیا واکمنیدو وروسته په کابل کې خپل سفارتونه تړلي او دمګړۍ له دوحې د چارسمبالو له لارې فعالیت کوي.
نور ولولئ: متقي: نړیوال دې پر سوداګرۍ محدودیتونه لرې کړي
دوی او د نورو هېوادونو استازي او دېپلوماتان که څه هم وخت ناوخت له طالب چارواکو سره ګوري، خو تر اوسه یوه هېواد هم د طالبانو حکومت په رسمیت نه دی پېژندلی.
دغه هېوادونه وايي، تر هغې چې طالبانو ټولګډونه حکومت جوړ، بشري حقونه رعایت او په ځانګړې توګه د نجونو پر زدکړو او د ښځو پر کار لګولي بندیزونه لغوه کړې نه وي، د رسمیت پېژندنې برخه کې یې پرمختګ ناشونی دی.
د طالبانو حکومتدارۍ کې بهبود شته؟
د طالبانو حکومت بهرنیو چارو وزارت اعلامیه وايي، ښاغلي متقي د بېلابېلو هېوادونو استازو سره د سېشنبې ورځې ناسته کې “د افغانستان د حکومت د وروستیو سیاسي، اقتصادي، امنیت، ښې حکومتدارۍ، مخدره توکو پر ضد مبارزې، د سلګونو پروژو پيلولو او همداسې نورو هر اړخیزو لاسته راوړنو او پرمختګونو په اړه تفصیلي معلومات ورکړل.”
په اعلامیه کې راغلي چې د طالبانو حکومت د مالیې وزارت د خزائنو عمومي رئیس نصرت الله محمود هم دې غونډه کې د افغانستان د مالي او اقتصادي وضعیت او د افغانستان بانک د عملیاتي بازار عمومي رییس ‘محمد عباس سامح’ د افغانستان په بانکي سکتور کې “د شفافیت، پرمختګونو او میکانیزمونو” په اړه مالومات شریک کړي.
نور ولولئ: متقي وايي د نړۍ له ډېرو هېوادونو سره مو اړيکې رسمي بڼه لري
همداراز د افغاني سرې میاشتې مرستیال “ملا نور الدین ترابې” هم د دې غونډې ګډونوالو سره خپلې اړتیاوې شریکې کړې.
تر دې مخکې دغې ټولنې پر خپل ټویټر لیکلي وو، چې ښاغلی ترابي “د یو شپږ کسیز پلاوي په مشرۍ د قطر پلازمینې دوحې ته د بشري مرستو د جلب په موخه” په رسمي سفر تللی دی.
