د امریکا بهرنیو چارو وزارت وايي، امریکا له پاکستان سره د ترهګریزو بریدونو په مخنیوي کې مرسته کوي

د امریکا د بهرنیو چارو وزارت ویاند له افغانستان څخه د پاکستان د امنیتي اندېښنو په تړاو ویلي، چې واشنګټن د ترهګرو ډلو له ګواښونو سره د مقابلې لپاره د پاکستان د وړتیا په لوړولو کې همکاري کوي. متیو میلر وویل چې امریکا له اسلام اباد سره په ترهګرۍ ضد جگړه کې دوه اړخیزه ملګرتیا لري.

د امريکا د بهرنيو چارو وزارت وياند د لړم په ٢٩مه، په يوه خبري غونډه کې له افغانستان سره د پاکستان اوسنۍ پولې ته څېرمه د وسله والو وروستي بريدونه او د اوو پاکستاني پوځيانو وژل وغندل.

پاکستان ته اوښتی زیان

میلر وویل، “د پاکستان خلکو له ترهګرو او شرخوښو بنسټپالو ډېر زیان لیدلی دی او موږ له هغو کورنیو سره غمرازي ښیو، چې په وروستیو بریدونو کې یې د کورنۍ غړي وژل شوي یا ټپیان شوي دي».

میلر دا هم وویل چې متحده ایالات ژمن دي چې د پاکستان د حکومت له مشرانو او مدني ټولنې سازمانونو سره کار وکړي څو د «بنسټپالو ترهګرو» ډلو د ګواښونو په ګوته کولو، مخنیوي او ځواب ویلو کې د وړتیاوو د تقویې فرصتونه تشخیص کړي.

نور ولولئ: د افغان ځواکونو په تړاو د کانګرېس ناستې په اړه د امریکا بهرنیو چارو وزارت خاموشي

نور ولولئ: طالبان: په غزه کې د اسراییلو جنګ وحشت او دوی جنګي مجرمین دي

نور ولولئ: د طالبانو رئیس الوزرا په غزه کې د اسرایلو وحشتونه غندلي

د امریکا د بهرنیو چارو وزارت ویاند د دې پوښتنې په ځواب کې چې ولې امریکا په افغانستان کې د مېشتو ترهګرو ډلو پر ضد کوم اقدام نه کوي، وویل: “موږ له ترهګرۍ سره د مبارزې په برخه کې له پاکستان سره مهمه دوه اړخیزه ملګرتیا لرو چې منظمې خبرې اترې او له ترهګریزو ګواښونو سره د مقابلې په برخه کې کاري سلامشورې پکې شاملې دي».

له دوحې تړون د طالبانو سرغړونه

د امریکا د بهرنیو چارو وزارت له دې وړاندې طالبان د دوحې د تړون له مادو څخه په سرغړونې تورن کړي وو او ویلي یې و، چې دې ډلې د القاعدې د مشرانو په ګډون ځینو ترهګرو ډلو ته پناه ورکړې ده.

متیو میلر ویلي و، واشنګټن له طالبانو غواړي چې په افغانستان کې د ترهګرو ډلو د زیاتېدونکي فعالیت په اړه ځواب ورکړي.

طالبانو په وار وار د تحریک طالبان پاکستان په ګډون جنګیالیو ډلو ته د پناه ورکولو او د نورو هېوادونو په ځانګړې توګه پاکستان امنیت او خاورې ته د افغانستان له اړخه ګواښونه رد کړي دي.

د یادونې وړ ده چې د پاکستان امنیتي حالت ورځ تر بلې خرابېږي.