پاکستان: د عضب للحق عملیات لا هم دوام لري
د پاکستان صدراعظم شهباز شریف ویلي، د «عضب للحق» په نوم پوځي عملیات لا هم روان دي او د وسلهوالو ډلو پر ضد دوام لري.
هغه د بلوچستان په کوټه ښار کې یوې پوځي غونډې ته د وینا پر مهال وویل، دغه عملیات د هغو وسلهوالو ډلو او پټنځایونو پر ضد ترسره کېږي چې د پاکستان په وینا، د افغانستان له خاورې فعالیت کوي.
شهباز شریف ویلي:
“د عضب للحق عملیات په کلک هوډ سره روان دي، څو د پاکستان د خلکو ژوند او امنیت خوندي شي.”
پاکستان د عضب للحق عملیاتو ته پراختیا ورکړې
د پاکستاني چارواکو په وینا، د عضب للحق عملیات د روان میلادي کال په فبرورۍ میاشت کې پیل شوي دي.
اسلاماباد ادعا کوي چې د پاکستان ضد وسلهوالې ډلې د افغانستان له خاورې بریدونه تنظیموي، خو افغان طالبان دا تورونه ردوي.
کابل تل ټینګار کړی چې هېڅ ډلې ته اجازه نه ورکوي څو د افغانستان خاوره د بل هېواد پر ضد وکاروي.
د کابل او اسلاماباد اړیکې لا هم ترینګلې دي
د راپورونو له مخې، د ۲۰۲۵ کال له اوربند وروسته هم د افغانستان او پاکستان ترمنځ څو ځله سرحدي شخړې او بریدونه شوي دي.
پاکستان پر کابل او پکتیکا هوايي بریدونه کړي وو، چې وروسته د دواړو لورو ترمنځ وضعیت نور هم کړکېچن شو.
سره له دې چې دواړو هېوادونو څو ځله د خبرو هڅه کړې، خو تر اوسه کومې واضح هوکړې ته نه دي رسېدلي.
پاکستان ټي ټي پي لوی ګواښ بولي
پاکستان وايي، د تحریک طالبان پاکستان (ټي ټي پي) فعالیتونه د دغه هېواد لپاره جدي امنیتي ګواښ دی او د عضب للحق عملیات هم د همدې ډلې او نورو وسلهوالو پر ضد روان دي.
افغان طالبان بیا وایي، د پاکستان د امنیت ساتنه د هماغه هېواد خپل مسوولیت دی او افغانستان به اجازه ورنه کړي چې خاوره یې د نورو پر ضد وکارول شي.
