د پاکستان پوځ د می میاشتې ۹مې له تاوتریخوالي ډکو لاریونونو په تړاو یاد کسان مجازات کړي
د پاکستان پوځ وايي دغه هېواد کې د مې میاشتې نهمې له تاوتریخوالي د ډکو احتجاجونو په تړاو د څېړنو پایله کې د یوه ډګر جنرال په ګډون درې پوځي افسران له دندونه کوښه او د دریو نورو تورنجنرلانو په ګډون د ۱۵ افسرانو خلاف سخت تادیبي ګامونه اخیستل شوي دي.
د پاکستان پوځ ویاند او د عامه اړیکو مشر جنرال احمد شریف چوهدري (د جون ۲۶مه) یوې خبري غونډې ته ویلي، چې پوځ د مې د نهمې پېښو په تړاو دوه جلا داخلي څېړنې بشپړې کړې دي.
نور ولولئ: پاکستانۍ موډله خدیجه شاه زندان ته واچول شوه
هغه وویل چې د ځینو متقاعدو پوځي جنرالانو د کورنیو غړو خلاف هم قضیې روانې دي.
ښاغلي چوهدري ژمنه وکړه چې د مې د نهمې پېښو پلانونکي او اسانچاري به که د هرې اورګان او ادارې اړوند وي، د قانون له مخې سزا وګوري.
د قول اردو قومندان پر کور ورختل
د پاکستان پوځ او حکومت وايي د تحریک انصاف ګوند غړي او ملاتړي پر دغه ورځ راولپنډۍ کې د پوځ پر مرکز او لاهور ښار کې د قول اردو قومندان پر کور ور وختل، په ویجاړیو یې لاس پورې کړ او پوځي تاسیساتو ته یې اور واچاوه.
په دې لړ کې د پاکستان له څو ښارونو هم پر پوځي تاسیساتو د بریدونو خبر ورکړ شوی و.
خو عمران خان دا د ده خلاف دسیسه بولي او ادعا کوي چې په بریدونو او ورانکاریو کې ښکېل کسان د ده له ګوند سره تړاو نه لري.
متقاعدو جنرالانو د کورنیو غړو او ملکیانو خلاف اقدامات
خدیجه شاه – د پاکستان پوځ د پخواني مشر جنرال اصف نواز جنجوعه لمسۍ ده
د پاکستان پوځ ویاند وايي چې د مې د نهمې پېښو په تړاو پوځي خدمت کې پر حاضرو افسرانو سربېره د څو متقاعدو جنرالانو د کورنیو غړو خلاف هم ګامونه اخیستل کېږي.
هغه وویل د یوه متقاعد څلور ستوري جنرال له لمسۍ، د یوه متقاعد څلور ستوري جنرال له زوم، د یوه متقاعد درې ستوري له ښځې او د یوه متقاعد دوه ستوري جنرال له ښځې او زوم سره ‘د نه ردېدونکو شواهدو” پر بنسټ د احتساب لړۍ روانه ده.
نوموړي که څه هم د دغو کسانو نومونه وانخیستل خو رپوټونه وايي، د پاکستان پوځ د مخکینې لوی درستیز جنرال اصف نواز جنجوعه د لمسۍ خدیجه شاه نوم په هغو کسانو کې شامل دی چې د مې د نهمې پېښو په تړاو له قانوني اقداماتو سره مخ دي.
