د ولسي جرګې پخوانی وکیل شاهپور حسن زی وايي چې طالبانو ناحقه بندي کړی او اوس به بېرته له هېواده ووځي
د پرځیدلي جمهوري نظام د ولسي جرګې یو ناندریز غړی شاه پور حسن زی، چې څه موده مخکې له پاکستان څخه کابل ته ستون شوی و؛ په یوه ویډیویي کلېپ کې ادعا کړې، چې د طالبانو رژیم ناحقه بندي کړی و او ښایي بېرته هېواد نه ووځي.
هغه له زیاتو جزیاتو پرته ادعا کړې، چې دغه له خپلو پوروړو کسانو څخه د پور غوښتلو په سر طالبانو بندي کړی او بیا یې د شناخته خلکو په همکارۍ په سختۍ را خوشې کړی.
حسن زي ته د طالبانو نه پام
حسن زي په دې اړه نور جزیات نه دي ورکړي، خو د طالبانو مشرانو ته یې په خطاب کې ویلي، چې د ده په وینا« چل ول» دې نه ورسره کوي.
نوموړي دا هم ویلي، چې که داسې چلند ورسره وشي او په خبره یې « ساتونکي» ورنه کړل شي؛ ښایي بېرته له هېواده ووځي.
شاه پور حسن زي کابل ته له ستنېدو وروسته، په څو تلویزوني خپرونو کې د طالبانو د رژیم له کړنو ملاتړ او پر مخالفانو یې توندې نیوکې کړې وې.
نور ولولئ: نسیم دانش: مسلمیار به کرکټ کې مداخله کوله
نور ولولئ: شکریه بارکزۍ وايي، طالبان ښځو ته هغه حجاب غواړۍ چې دوی به ځانمرګي بریدونه په کې کول
هغه د پرځیدلي جمهوري نظام پر مهال، د هغه نظام له منتقدانو څخه هم و.
د طالبانو چارواکو او ویاندویانو د نوموړي ادعا او څرګندونو ته کوم غبرګون نه دی ښودلی.
د ځمکو پر غصب د هغه تورنېدل
د جمهوري نظام پر مهال ښاغلی حسن زی د ځینو مخالفانو لخوا یې د ځمکو په غصب او زورواکۍ تورن شوی و، خو هغه داسې ادعاوې بې اساسه ګڼلې وې.
دا په داسې حال کې ده، چې تازه د طالبانو د عدلیې وزیر عبدالحکیم شرعي لخوا د ځمکو د غصب په تور له یو شمېر نورو مخکینیو وکیلانو او سیاسي څېرو سره د توند چلند او ان د وزارت دننه یې د زنداني کېدو ادعاوې شوي.
د طالبانو عدلیې وزارت په دې اړه راپورونه رد کړي، خو ویلي چې شرعي د ځمکو د غصب د مخنیوي کمیسیون د مشر په توګه تر لسو ورځو د تورنو کسانو د بند کې ساتلو حق لري.
د یادونې وړ ده چې طالبانو د یو شمېر نورو وکیلانو جایدادونه او موټر هم نیولي دي. طالبانو تېر کال د فریدې کوچۍ په نوم وکیلې کور نړولی و او له کوره یې ورڅخه په میلیونونو افغانۍ له ځان سره وړي وې.
