کرزی نجونو او هلکانو ته؛ په زده کړو کې له هرې هڅې کار واخلئ

حامد کرزي د هېواد له نجونو او هلکانو غوښتي، د زده کړو په کولو کې دې له هرې هڅې کار واخلي

هاخوا افغان ولس تمه لرله چې د نوي ښوونیز کال له پیل سره به طالبان د افغان نجونو پر مخ د پوهنتونونو او ښوونځیو دروازې پرانیزي، خو طالبانو دغه کال هم نجونو ته د زده کړو اجازه ورنه کړه.

دغه پخواني افغان ولسمشر بار، بار له طالبانو د نجونو پر مخ د ښوونځیو او پوهنتونونو د خلاصون غوښتنه کړې، خو طالبانو په دې برخه کې د پخوا په څېر د ښځو پر وړاندې ځپونکی دریځ خپل کړی او ښځینه طبقه یې له زده کړو محرومه کړي ده.

دا ځل له نجونو او هلکانو د ښاغلي کرزي غوښتنه

پخواني افغان ولسمشر د نوي لمريز کال په مناسبت په خپل پیغام کې پر هلکانو او نجونو غږ کړی، چې د زده کړو په برخه کې له یو ډول هڅو هم لاس وا نه خلي.

ښاغلي کرزي نږدې ۱۲ ورځ وړاندې د ښځو نړۍوالې ورځې په مناسبت پیغام کې هم له طالبانو غوښتي وو، چې نوی ښوونیز کال کې نجونو ته د ښوونځي او پوهنتوني زدکړو اجازه ور کړي.

نور ولولئ: جوزپ بورل: په افغانستان کې له ښځو سره روان چلند له زغم وتلی دی

نور ولولئ:  ګوتریش: په افغانستان کې ښځې له عمومي ژوند څخه محرومې شوې دي

نور ولولئ: طالبان افغانستان کې ښځې له کار او زده کړو منع کوي، خو بهر کې له نیم لوڅو سره انځورونه اخلي

نوموړي نن په خپل پیغام کې که څه هم د نجونو پر زده کړو د بندیزو نه ختمېدو ته اشاره نه ده کړې؛ خو زیاته کړې یې ده: «د نجونو او هلکانو په ګډون پر ګرانو ځوانانو غږ کوم چې د تعلیم په برخه کې او لوړو تحصیلي درجو تر لاسه کولو کې له هېڅ ډول هڅو لاس وا نه خلی؛ تر څو زموږ هېواد د خپلو بچیانو په لاس ځان بساینې، پرمختګ او لوړتیا ته ورسېږي.»

له زده کړو د نجونو راګرځول

طالبانو د ۲۰۲۱ کال اګسټ کې په واکمنېدو سره لومړی د نجونو له شپږم ټولګي پورته او وروسته د دوی پوهنتوني زده کړې بندې کړې.

د نوي لمريز کال په درشل کې پر افغان شخصیتونو او پخوانیو چارواکو سربېره ولس هم له طالبانو په یوه بله پلمه د نجونو د زدکړو د پیلدو غوښتنه کوله؛ خو دې ډلې نن د ښوونیز کال د پیلېدو مراسمو کې په دې هکله څه ونه ویل.

حامد کرزي د طالبانو له خوا د نوي کال نه نمانځلو ته له اشارې پرته د خپل پیغام اخر کې لیکلي، چې کوم ملتونه خپل لرغوني او تاریخي دودونه ساتي؛ نو د پرمختګ پر لار هم ځواکمن او هدفمن روان دي.

د یادونې وړ ده چې طالبان د نجونو د زده کړو په برخه کې له خپل نیولي دریځ په شا کېدونکې نه دي.