د افغانستان کرېکټ بورډ وايي، د افغانستان او زمبابوې تر منځ ټیسټ لوبه به سبا پیل شي
د افغانستان او زمبابوې کرکټ ملي لوبډلو ترمنځ د ټیسټ کرکټ لومړۍ لوبه سبا پنجشنبه د مرغومې یا جدي په ۶مه پیلېږي.
افغان لوبډلې تر دې وړاندې له زمبابوې سره د شل اوره او یو ورځنیو لوبو لړۍ ترسره کړې، چې دواړه یې ترې ګټلې دي.
ټېسټ لوبو ته اعلان شوې لوبډله:
حشمت الله شهیدي د لوبډلمشر او رحمت شاه د مرستیال لوبډلمشر، دغه راز افسر ځاځی او اکرام علي خېل د ویکټ ساتونکو په توګه ځای لري؛ عبدالمالک، ریاض حسن، بهیرشاه محبوب، صدیق اتل، عصمت الله عالم، عظمت الله عمرزی، ضیاء اکبر، زاهد شهزاد، راشدخان، ظاهرخان، یمین احمدزی، بشیر احمد، فرید ملک او نوید ځدراڼ د نوملړ برخه دي.
دغه راز ناصر جمال، ضیاء الرحمن شریفي او ابراهیم عبدالرحیمزي ته هم په یاد نوملړ کې د احتیاطي لوبغاړو په توګه ځای ورکړل شوی دی.
نور ولولئ: د کرېکټ پر لوبغاړو د طالبانو تبلیغاتي ډلې نیوکې
نور ولولئ: کرېکټ؛ افغان اتلانو زېمبابوې ته په دویمه ۲۰ اوریزه لوبه کې ماته ورکړه
د دواړو لوبډلو ترمنځ به دوهمه ټیسټ لوبه د راتلونکي ۲۰۲۵ز کال د جنوري میاشتې له دویمې نېټې تر شپږمې نېټې پورې ترسره کړي.
په ورځنیو لوبو کې د زمبابوې ماتول
په ورځنیو لوبو کې افغان لوبډلې زمبابوې ټیم ته په لوی توپیر ماته ورکړې وه.
هغه مهال د افغانستان او زمبابوې کرېکټ لوبډلو تر منځ د یو ورځنیو لوبو د لړۍ دویمه سیالي افغان لوبډلې د ۲۳۲ منډو په لوی توپیر وګټله.
دې بري سره اوس افغانستان د دریو یو ورځنیو لوبو په دې لړۍ کې یو صفر مخته شو.
په هغه لوبه کې افغان لوبډلې لومړی بیټېنګ وکړ او په ټاکلو پنځوسو اورونو کې یې ۲۸۶ منډې وکړې.
کوربه زمبابوې یوازې وتوانېده چې په ۱۸ ارونو کې د ټولو لوبغاړو په سوځېدو ۵۴ منډې جوړې کړي.
د افغانستان په توپ اچوونکو کې نوید ځدران او غضنفر درې درې او فضل حق فاروقي دوه لوبغاړي وسوځول.
افغان لوبډلې په دې وروستیو کې په ځانګړي توګه ۲۰۲۳ او ۲۰۲۴ کلونو کې د کرېکټ په برخه کې لویې لاسته راوړنې درلودې. مثلاً: د پاکستان، سوت افریقا، استرالیا او نورو په څېر یې لوی، لوی ټیمونه د کرېکټ په میدان کې له پښو راوغورځول او ددغه ټولو ویاړ یې د افغانستان او افغان ملت په برخه کړ.
د کرېکټ لوبې پوهان وايي، افغان لوبډله د توقع خلاف بره روانه ده او د هرې ورځې په تېرېدو پیاوړي کېږي.
