اروپا ته د دوبي په درشل کې د سختې ګرمۍ یوه پراخه څپه رسېدلې چې د وچې په ګڼو هېوادونو کې یې د تودوخې کچه بېساري لوړه کړې ده. د هواپېژندنې ادارو خبرداری ورکړی چې په ځینو سیمو کې د تودوخې درجه تر ۴۰ سانتيګرادو رسېدلې او دا وضعیت د خلکو روغتیا، ترانسپورټي شبکو او چاپېریال ته جدي ننګونې رامنځته کوي.
په بریتانیا کې د چهارشنبې ورځ د جون میاشتې له تر ټولو تودو ورځو څخه وه. د دغه هېواد د هواپېژندنې ادارې (Met Office) له خلکو غوښتي چې د ورځې له ۱۱ بجو څخه تر ۳ بجو پورې له مستقیم لمر څخه ځان وساتي، ډېرې اوبه وڅښي او د لمر ضد کریم وکاروي.
اروپا ته د دوبي په درشل کې، د ګرمۍ څپې تر شا څه عوامل دي؟
کارپوهان وايي، د تودوخې اوسنی زیاتوالی د افریقا له صحرا څخه د ډېرې ګرمې هوا د راتګ او د لوړ فشار د یوه پیاوړي سیسټم له امله رامنځته شوی دی. دغه سیسټم چې د “افریقایي انټيسایکلون” په نوم یادېږي، د اروپا پر لوېدیځو او مرکزي سیمو د تودوخې یوه ګنبده جوړه کړې او ګرمه هوا یې په سیمه کې بنده ساتلې ده.
د تودوخې څپه د جون له ۲۱مې نېټې، چې په شمالي نیمه کره کې د دوبي رسمي پیل بلل کېږي، هممهاله پیل شوې او تمه ده چې په راتلونکو ورځو کې هم دوام وکړي.
ایټالیا، هسپانیا او فرانسه تر ټولو ډېرې اغېزمنې شوې
په ایټالیا کې چارواکو د روم، میلان، فلورانس او تورین په ګډون د اتو ښارونو لپاره د لوړې کچې خبرداری صادر کړی دی. په هسپانیا کې هم د هواپېژندنې ادارې د هېواد په پراخو سیمو او د مایورکا په ټاپو کې د ۳۹ تر ۴۰ سانتيګرادو تودوخې اټکل کړی او ویلي یې دي چې دغه وضعیت به لږ تر لږه د اوونۍ تر نیمایي دوام وکړي. اروپا ته د دوبي په درشل کې
فرانسه هم د سختې ګرمۍ له امله له ستونزو سره مخ شوې ده. د دغه هېواد د اورګاډو ملي شرکت ویلي چې لوړې تودوخې د برېښنايي مزو د زیان او د رېلپټلۍ د پراخېدو خطر زیات کړی، له همدې امله لسګونه اورګاډي سفرونه لغوه شوي دي.
په جرمني کې بیا د سختې ګرمۍ ترڅنګ توپانونو او درنو بارانونو هم یو شمېر بهرني پروګرامونه او عامه غونډې ګډوډې کړې دي.
د ژوو او چاپېریال لپاره هم ګواښ
د سختې ګرمۍ اغېزې یوازې پر انسانانو نه دي محدودې. په بلجیم کې د حیواناتو د ساتنې مرکزونو ویلي چې د مرغانو د بچیو او نورو ژوو د زیانمنېدو پېښې زیاتې شوې دي.
د دغو مرکزونو په وینا، ډېری مرغان د تودوخې له امله له وخته مخکې له خپلو ځالو راوتلي او یو شمېر یې مړه شوي دي.
اقلیمي بدلون د اروپا تودوخه لا زیاتوي
د اقلیم متخصصان باور لري چې د اقلیمي بدلون له امله په اروپا کې د تودوخې څپې ورځ تر بلې شدیدې او اوږدې کېږي. د «کلیمامیټر» د څېړنې له مخې، د انسانانو له لوري رامنځته شوی اقلیمي بدلون د روانې ګرمۍ څپه تر څلورو سانتيګرادو پورې لا ګرمه کړې ده. اروپا ته د دوبي په درشل کې
د معلوماتو له مخې، پاریس شاوخوا ۲.۴ درجې، میلان ۳.۸ درجې او د هسپانیا زاراګوزا ښار نږدې ۴ درجې د اقلیمي بدلون له امله زیات تود شوي دي.
د اروپايي ټولنې د کوپرنیکس د اقلیمي بدلون د څارنې سرویس د معلوماتو له مخې، اروپا اوس د نړۍ تر ټولو چټکه تودېدونکې وچه بلل کېږي او د ۱۹۸۰مو کلونو راهیسې پکې د تودوخې د لوړېدو کچه د نړیوال اوسط په پرتله نږدې دوه برابره چټکه ده. اروپا ته د دوبي په درشل کې
کارپوهان خبرداری ورکوي چې که د اقلیمي بدلون مخنیوي لپاره اغېزمن ګامونه پورته نه شي، نو اروپا ته د دوبي په درشل کې د دې ډول سختو ګرمۍ څپو تکرار به لا ډېر شي او د خلکو پر ژوند، اقتصاد او طبیعي چاپېریال به ژور اغېز وکړي. اروپا ته د دوبي په درشل کې
