ددې هوېواد لومړی وزیر وايي، باید د رېل پټلۍ کارونه ژر تر ژره پیل شي او دغه سیمه ونښلول شي
د پاکستان اقتصادي وضعیت په چټکۍ سره د رکود خواته روان دی او له همدې امله هڅه کوي چې د پاکستان سوداګري منځني ختیځ هېوادونو ته وغځوي او دغه سیمه وصل کړي.
د پاکستان لومړی وزیر د دغه هېواد، افغانستان او ازبکستان ترمنځ د پټلۍ جوړېدل مهم بولي او وايي؛ اسلام اباد غواړي دا پروژه ژر پلې شي.
شهباز شریف نن په اسلام اباد کې د ازبکستان د بهرنیو چارو له وزیر بختیار سیدوف سره په لیدنه کې دا خبره کړې ده.
د سیمه ییز اتصال اهمیت
د پاکستان دولتي رادیو وايي؛ ښاغلی شریف او بختیار سیدوف د سیمه ییز اتصال لپاره د افغانستان د سولې او پرمختګ پر اهمیت هم وغږېدل.
د پاکستان لومړي وزیر ویلي، چې د خپلمنځي تجارت او د سیمې د نښلولو لپاره له ازبکستان سره د پروژو ژر بشپړېدلو ته ژمن دي.
نور ولولئ: طالبان: ۱۰ میاشتو کې ۱۲۲ میلیارده افغانۍ صادرات شوي
نور ولولئ: د اوسپنې پټلۍ اداره: شاوخوا ۸۱زره مټرېک ټنه صادرات او واردات مو کړي
نوموړي په دغه لیدنه کې له ازبکستان د افغانستان له لارې پاکستان ته د پټلۍ تېرېدو د پروژې پر ژر پلي کېدو ټینګار وکړ.
دغه پټلۍ به د منځنۍ او سوېلي اسیا په نښلولو سره مسافرو د تګ و راتګ او د توکو د لېږدولو چارې اسانه کړي او په سیمه ییزه سوداګرۍ او اقتصادي وده کې به مرسته وکړي.
د دغو هېوادونو ترمنځ د پټلۍ د جوړولو پلان په ۲۰۱۸ کال کې د یوې لویې اقتصادي لویې لارې د جوړولو لپاره وړاندې شو. چې منځنۍ اسیا د پاکستان د اوبو له بندرونو سره نښلوي.
د دغې پټلۍ د جوړولو لګښت څه باندې څلور نیم میلیارډه ډالره اټکل شوی دی او ۵۷۳ کیلومتره اوږدوالی لري.
د دغه پلان پر بنسټ؛ دا پټلۍ د ازبکستان له ترمز پیلېږي او له مزارشریف او کابل ښارونو تر تېرېدو وروسته د پاکستان پېښور ته رسېږي.
د پاکستان لوېدلی اقتصادي حالت
د پاکستان اقتصاد د رکود پر لور روان دی. دغه هېواد هڅه کوي چې په همدې لوېدلي اقتصاد کې د افغانستان له لارې د منځنۍ اسیا له هېوادونو سره ځان وصل او دغه هېوادونو ته خپله سوداګري وغځوي.
دا په داسې حال کې ده چې اسلام اباد افغان سوداګرو ته د کراچۍ او ګوادر بندرونو کې افغان سوداګرو ته ستونزې جوړوي او د پاکستان همدې کار د دواړو هېوادونو تر منځ سوداګري ټکنۍ کړي ده.
