اسلام اباد وايي، چې پاکستان کې وروستی ځانمرګی برید په افغانستان کې طرح او افغاني کړی دی
د پاکستان د ترهګرۍ پر وړاندې د مبارزې مرکز ویلي، چې د پاکستان په خېبرپښتونخوا ایالت کې پر چینايي وګړو د شوې چاودنې بریدګر افغان و.
دغه مرکز ویلي، چې د پاکستان امنیتي ځواکونو د دغه برید په تړاو ۱۰ کسان نیولي، چې ټول د تحریک طالبان پاکستان سره تړاو لري.
طالبانو بیا دا ډول تورونه تل رد کړي
څو ورځې وړاندې د طالبانو ویاند ذبیح الله مجاهد وویل، پاکستان کې روان کړکېچ په افغانستان کې د طالبانو په رژیم پورې هېڅ تړاو نه لري، او داد پاکستان خپله داخلي موضوع ده.
پر چینايي وګړو برید د پاکستاني چارواکو غوسه راپارولې او د دغه هېواد چارواکو ګواښ کړی چې د دغه برید له مستقیم او غیر مستقیم ملاتړ کوونکو به غچ واخلي.
نور ولولئ: پاکستان کې ناامني؛ ډیره اسماعیل خان کې چاودنې ۲۷ کسانو ته مرګ ژوبله اوړلې
نور ولولئ: په پاکستان کې د وسلهوالو بریدونو ډېرېدل؛ اسلام اباد له طالبانو غوښتي چې ترهګر وځپي
نور ولولئ: سرچینې: په تېرو څو ورځو کې پاکستان کې ۵ بریدونو ۱۸ کسان وژلي
د وري میاشتې په اتمه نېټه د خیبرپښتونخوا په بشام سیمه کې د یوه ځانمرګي برید له امله پنځه چینايي انجینران له خپل پاکستاني موټر چلوونکي سره ووژل شول.
له دغه برید وروسته چینايي شرکتونو د دیامیر او داسو بندونو کار د لنډ وخت لپاره بند کړ. د دغو بندونو د مسوولانو د معلوماتو له مخې، د پاکستان په خیبرپښتونخوا ایالت کې شاوخوا زرو چینايي انجنیرانو په دغو بندونو کار کاوه.
پاکستان کې د چین پانګونه
چين تر اوسه پورې د پاکستان په بنسټيزو تاسيساتو کې د يو سړک او يو کمربند د يوې لويې پروژې په توګه له ۶۵ میليارډو ډالرو څخه زياته پانګونه کړې ده.
تر دې مخکې هم د داسو بند پر چینايي انجینرانو د ترهګرو لخوا برید شوی و.
په ۲۰۲۱ کال کې، د نهو چینایي انجینرانو په ګډون ۱۳ کسان په داسو بند کې د «ترهګریز برید»په پایله کې ووژل شول.
