بلخ، بامیان او غزني ولایتونو ته د بهرنیو سیلانیانو ورتګ د نورو کلونو په پرتله زیات شوی
پر افغانستان د طالبانو د بیا واکمنېدو سره سم د بهرنیو سیلانیانو تګ راتګ هم زیات شوی دی او ګڼ کسان له بېلابېلو هېوادونو افغانستان ته تشریف راوړي.
نور ولولئ: د غزني تاریخي ابدو لېدنې ته ګڼ سیلانیان ورمات شوي
د بلخ د اطلاعاتو او فرهنګ ریاست مسوولان وايي چې روان کال د دغه ولایت له تاریخي او لرغونو سیمو څخه د لیدنې په موخه د بهرنیو سیلانیانو ورتګ زیات شوی دی.
له بلخ تاریخي ولایت څخه د بهرنیو سیلانیانو لیدنه
د یاد ولایت د اطلاعاتو او فرهنګ ریاست د اطلاعاتو امر عطامحمد ساهو ویلي چې د روان کال د لومړیو شپږو میاشتو پر مهال دغه ولایت ته ۴۵۶ بهرني سیلانیان ورغلي دي.
د نوموړي په وینا، تېر ۱۴۰۱ یوه کال کې یوازې ۱۲۱ بهرني سیلانیانو د دغه ولایت له تاریخي او سیلاني سیمو څخه لیدنه کړې وه.
نور ولولئ: ‘درنه’ تاریخي سیمه کې سېلابونه؛ به لرغونو اثارو او د صحابه په مقبرې څه وشول؟
د یاد ولایت د اطلاعاتو او فرهنګ ریاست د اطلاعاتو امر عطامحمد ساهو زیاته کړه چې د بهرنیو سیلانیانو د راتلو له درکه دې موده کې ۵۰زره ډالره عواید هم ټول شوي دي.
نوموړی له سوداګرو، خصوصي سکټور او بنسټونو غواړي چې د دغه ولایت تاریخي ودانۍ او سیمې چې د نړېدو له ګواښ سره مخ دي، بېرته ورغوي، څو د سیلانیانو شمېر نور هم زیات شي.
له بهرنیو سیلانیانو ثبت
د ساهو په وینا، هر هغه بهرنی سیلاني چې افغانستان ته راځي، د ثبت پر مهال ترې ۵۰ ډالره اخیستل کېږي. د معلوماتو له مخې، بلخ څه باندې ۱۲۰ تاریخي سیمې لري چې هر کال ګڼشېمر کورني او بهرني سیلانیان یې د لیدو لپاره ورځي.
حضرت علي «رض» ته منسوب زیارت، د مولانا جلالالدین بلخي د پلار خانقاه، د ابو نصر پارسا جومات، د رابعه بلخي زیارت او یوشمېر ځایونه او ودانۍ د سیلانیانو لپاره د دغه ولایت د لیدو وړ سیمې بلل کېږي.
پر دې سربېره بامیانو او غزني تاریخي ولایتونو ته د بهرنیو سیلانیانو ورتګ زیات شوی دی او طالبان وايي، ددغه بهرنیانو له ورتګ یې په عوایدو کې زیاتوالی راغلی دی. بهرني ګرځندویان وايي، افغانستان د نړۍ په کچه تاریخي سیمې لري چې د نړۍ ګڼ لرغونپوهان ورته راځي او دغه تاریخي سیمې ګوري.
طالبان دغه لاسته راوړنه په افغانستان کې ښه امنیت بولي، خو د دوی منتقدین وايي چې په خوا هم طالبانو امنیت خراب کړی و او ګڼ بهرنیان او افغانان یې وژل.
