د افغانستان فوټبال ټیم د ۲۰۲۶ نړیوال جام غوراوي سیالیو کې هند ته ماتې ورکړه
د افغانستان د فوټبال ملي لوبډلې د هند د فوټبال ملي لوبډلې ته په خپل کور کې ۲-۱ ماتې ورکړه.
دا لوبه نن سه شنبه مارچ ۲۶ (حمل اوومه) د هند د اسام ایالت د ګواهاتي په ښار کې وشوه.
د لوبې په لومړۍ نیمایي کې هند په افغانستان باندې یو ګول وهلی و او مخکې و. د هند کپتان سنیل چیتري د لوبې په ۳۷مه دقیقه کې دا ګول وواهه.
په ۷۷ دقیقه کې د لوبې مساوي کېدل
خو د لوبې د دویمې برخې په ۷۷ دقیقه کې افغان لوبغاړي رحمت اکبري په هند ګول وواهه او لوبه ۱-۱ مساوي شوه.
له هیجانه د دغې ډکې لوبې په ۸۸ دقیقه کې د هند یو لوبغاړي د افغان لوبغاړي د مخنیوي په هڅه کې فول وکړ او لوبڅار هغه پنالټي وباله او هندي لوبغاړي ته یې زېړ کارت هم ورکړ.
افغان لوبغاړي شریف محمد د پنالټي شوټ ګول کړ او افغانستان دا لوبه ۲-۱ وګټله.
نور ولولئ: فوټبال؛ افغانستان نړیوال جام ته د لار موندنې نوي پړاو ته ورسېده
نور ولولئ: د ښځو فوټبال نړیوال جام؛ حجاب لرونکې لوبغاړي د مینهوالو پام ور اړولی
دا لوبې د فوټبال د ۲۰۲۶ نړیوال جام او د اسیا د ۲۰۲۷ د غوراوي پړاو دي. افغانستان او هند د پنجشنبې په ماښام مارچ ۲۱ (وري دویمه) د سعودي عربستان د خمیس ښار د ضمک په لوبغالي کې صفر-صفر لوبه مساوي کړې وه.
د افغان فوټبال ملي لوبډلې ګروپ بندي
د افغانستان په لوبډلې کې اویس عزیزي، اسلام الدین امیري، محبوب حنفي، جبار شرزه، حبیب الله عسکر، مصور احدي، رحمت اکبري، امید پوپلزی، توفی سکندري، ذوالفقار نظري او شریف محمد وو.
افغانستان تر دې مخکې د ۲۰۲۶ د نړیوال جام د غوراوي د دویم پړاو په سیالیو کې په قطر او کویټ باندې لوبې بایللې وې او له همدې کبله یې له هند څخه د لوبې ګټلو ته اړتیا ډېره وه.
افغانستان د دغو سیالیو په جدول کې د کویټ، قطر او هند سره په ګروپ کې دی. خو که افغانستان په فوټبال کې سیالانو ته ماتې ورکړي، نو له دغه ګروپ مخکې تللی شي.
له دې وړاندې په فوټسال سیالیو کې هم افغان لوبډلې د پام وړ رول لوبولی و او د افغانستان لپاره یې لوبې ګټلي وې.
افغان کرکټ ملي لوبډله که څه هم په دې وروستیو کې خوندورې لوبې ونه کړي، خو په اخریني سریز کې یې ایرلنډ ته پرله پسې ماتې ورکړې او لوبلړۍ یې د افغانستان په نوم کړې.
