اړوند خبرونه:
د ۲۰۲۴ کال په رارسېدو افغانستان کې د لوږې بحران
د مرستو کمېدل، پر خوارځواکۍ د اخته ماشومانو او میندو زیاتېدنه
د یوې مرستندویه ادارې یو مسئول په دې وروستیو کې خبرداری ورکړی چې د امریکا د مالي مرستو د کمښت له امله به افغان ماشومان خپل ژوند له لاسه ورکړي.
د افغانناو د راپور پر بنسټ افغانستان کې د “لوږې پر وړاندې اقدام” مشر کوبي ریتفیلد خبریالانو ته ویلي: “که ماشومان چې پر خوارځواکۍ اخته دي، درملنه یې ونه شي، د هغوی د مرګ خطر ډېر لوړ دی.”
دا خبر وروسته له هغه خپور شوی چې د امریکا د پخواني ولسمشر ډونالډ ټرمپ حکومت د بهرنیو مرستو قراردادونه په ځانګړې توګه افغانستان ته ځانګړې شوې مرستې لغوه کړې. اوس مهال د افغانستان له نیمایي زیات خلک د ژوند کولو لپاره په بشري مرستو پورې تړلي دي.
د “لوږې پر وړاندې اقدام” سازمان د مارچ میاشتې په ترڅ کې د امریکا د بودیجې د ناڅاپي پرې کېدو له امله د امریکا تمویل شوې ټول فعالیتونه ودرول. دغه سازمان د خپل داخلي بودیجې په کارولو بدخشان ولایت او پلازمېنې کابل کې ځینې اړین خدمات وړاندې کول، خو دا خدمات هم اوس درېدلي دي.
کابل کې د دې سازمان د حاد سوء تغذیې درملنې ځانګړې څانګه اوس مهال خالي ده او ټاکل شوې چې دغه اونۍ وتړل شي. په دې مرکز کې هیڅ ناروغان نشته او د امریکا د مالي مرستو د قطع کېدو له امله د کارکوونکو قراردادونه هم فسخ شوي دي.
ریتفیلد ویلي: “که په حاد سوء تغذیه اخته ماشومان درملنه ترلاسه نه کړي، د هغوی د مرګ خطر ډېر لوړ دی. هېڅ ماشوم باید د سوء تغذیې له امله خپل ژوند له لاسه ورنه کړي. که موږ د لوږې پر وړاندې مبارزه ونه کړو، خلک به د لوږې له امله مړه شي. که روغتیایي پاملرنې ترلاسه نه کړي، د هغوی د مرګ خطر ډېر دی. دوی اوس مهال روغتیایي پاملرنه نه ترلاسه کوي او د دې په پایله کې خپل ژوند له لاسه ورکوي.”
