د ټولګټو چارو وزارت وايي، په افغانستان کې د زیاتې واورې اورېدو له امله په هېواد کې ځینې لارې تړل شوي دي
د افغانستان په لوړو غرنیو سیمو کې د واورو سختو ورښتونو څو مهمې لارې تړلي او ډېرو سیمو کې د خلکو تګ راتګ ټکنی شوی.
د طالبانو په حکومت کې د ټولګټو چارو یا فواید عامې وزارت ویاند محمد اشرف حق شناس ویلي ” پر سالنګونو تېره شوې لویه لار او د بار وړونکو وسایطو پر مخ مواقتاً تړلې ده خو د مسافر وړونکو وسایطو پر مخ پرانیستې ده.”
له دوو ورځو راهیسې د شوي اورښت اندازه
ښاغلي حق شناس وویل د پنجشبې پر ورځ له ۴۰ سانتي متره تر ۵۰ سانتي متره واوره ورېدلې او د ورښت به دوام سره ښايي دغه کچه پورته تللي وي.
د ټولګټو چارو وزارت یوه وینا پاڼه کې کاږي” د کابل – بامیان لویه لار د میدان وردګ ولایت اړوند د اونۍ کوتل په سیمه کې د تیزې واورې د اورښت له امله د ترافیکو پر مخ تړل شوې ده چې د خلاصون هڅې یې روانې دي.”
نور ولولئ: نن د افغانستان په ۳۲ ولایتونو کې د واورې او اورښت خبر ورکړل شوی
نور ولولئ: د هوا د ککړتیا له امله د کابل ښاریانو شکایت
نور ولولئ: د امریکا نظامي اډو د افغانانو صحت او چاپیریال ته پام نه کاوه
د بامیانو او دایکندي ترمنځ لویه لاره هم د قوناق کوتل په سیمه کې د ورښتونو له امله بنده ده. چارواکو ویلي په شمالي ولایت سرپل ولایت کې “د قم کوتل مسیر د لنډمهال لپاره د ترافیکو پر مخ تړل شوی دی.”
په څو ولایتونو کې د واورې زیات اورښت
په نورستان، غور، پکتیا، دایکندي، فاریاب، میدان وردګ، لوګر، غزني او بدخشان ولایتونو کې هم دا دویمه ورځ ده چې سختې واورې ورېدلي.
د ټولګټو وزارت ویاند وايي، د سړکونو د ساتنې او څارنې د چارو مرستیال ملا عبدالجبار له ټولو ولایتي استازو، او اړونده قراردادي شرکتونو سره د همغږۍ په یوه غونډه کې له هغوی غوښتي چې د لارو د خلاصون وسیلې دې لویو لارو او هغو سیمو ته ولېږدوي چې د بندیدو امکان یې شته.
د طالبانو حکومت کې د لارو د څار او کنټرول ادارو له خلکو غوښتي چې د سفر پر مهال دې ” د وسایطو لپاره ځنځیر، ژمنۍ تودې جامې او د اړتیا وړ خوراکي توکي له ځان سره ولري.”
د افغانستان پر لویو لارو د دا ډول ورښتونو پر وخت ډېر کله د ناپامۍ، پر لارو د ټرافیکي قوانینو د نه پلې کېدا، د څار کموالي او له لویه سره دسړکونو غیرې معیاري جوړښت د مرګونو ټرافیکي پېښو لامل کېږي.
