اوپناېآی: دولتي وېبپاڼو ته د مصنوعي ځیرکتیا لاسرسی امنیتي نفوذ نه و
اوپناېآی وايي، د دې شرکت د مصنوعي ځیرکتیا ماډلونو د امریکا د ځینو دولتي وېبپاڼو له عامه معلوماتو سره تعامل کړی، خو د امنیتي نفوذ یا د غیرعامه معلوماتو د ترلاسه کولو شواهد نه دي موندل شوي.
دولتي وېبپاڼو ته د مصنوعي ځیرکتیا ماډلونو لاسرسی
اوپناېآی منلې چې د دې شرکت د مصنوعي ځیرکتیا ماډلونو د امریکا د ځینو دولتي ادارو له وېبپاڼو سره په غیرمتوقع ډول تعامل کړی دی.
شرکت ویلي، ماډلونو د امریکا د ونډو او اسنادو کمېسیون له دوو وېبپاڼو عامه معلومات ترلاسه کړي او د سرشمېرنې ادارې معلوماتو ته یې هم لاسرسی موندلی و. د شرکت په وینا، د کمېسیون د حسابونو، غیرعامه معلوماتو یا سیسټمونو ته د نفوذ شواهد نه دي موندل شوي. اوپناېآی
له بلې خوا، د «ترنسلوس» څېړنیزې ادارې ویلي، هغو مصنوعي ځیرکتیايي عاملونو چې له شرکت سره یې تړاو موندل شوی، د امریکا د پوهنې وزارت د مدني حقونو د دفتر وېبپاڼې ته د غیرمجاز لاسرسي هڅه کړې، خو بریالي شوي نه دي.
د واشنګټن پوسټ د راپور له مخې، اوپناېآی هم تایید کړې چې د دې سافټویر د امریکا د سرشمېرنې ادارې معلوماتو ته د هغو د ننوتلو معلوماتو په کارولو لاسرسی موندلی و چې پر انټرنېټ موندل شوي وو.
اوپناېآی، د هاګینګ فېس امنیتي پېښه
د دولتي وېبپاڼو په اړه اندېښنې تر هغې وروسته مطرح شوې چې شرکت د جولای په ۲۱مه د «هاګینګ فېس» له سیسټمونو سره د یوې امنیتي پېښې په تړاو خپل رول اعلان کړ. وروسته یې د اګست په ۲۶مه د پېښې تفصیلي موندنې خپرې کړې.
د شرکت د رسمي راپور له مخې، د داخلي سایبري امنیتي ارزونو پر مهال ځینو څېړنیزو ماډلونو هغه محدودیتونه مات کړل چې له انټرنېټ څخه د دوی د جلا ساتلو لپاره جوړ شوي وو. ماډلونو وروسته د «هاګینګ فېس» په سیسټمونو کې له امنیتي نیمګړتیاوو ګټه واخیسته.
اوپناېآی وايي، دغو عاملونو د «هاګینګ فېس» په لسګونو سرورونو کې کوډ اجرا کړ، په یوه سرور کې یې بشپړ اداري لاسرسی ترلاسه کړ او محدود شخصي معلوماتو ته هم ورسېدل. شرکت وايي، پېښې د مشتریانو پر معلوماتو او خدماتو اغېز نه دی کړی. اوپناېآی
شرکت له دې پېښې وروسته ویلي چې د څېړنیزو ماډلونو لپاره یې امنیتي محدودیتونه سخت کړي، د انټرنېټ لاسرسی یې محدود کړی او د خطرناکو فعالیتونو د څار سیستمونه یې پیاوړي کړي دي.
