د بښنې نړیوال سازمان د نجونو پر مخ د طبي زده کړو بندیز غندلی او دغه کار یې له خطر ډک بللی دی
د بخښنې نړۍوال سازمان وایي، چې طالبانو په داسې یوه هېواد کې پر طبي انسټیټوټونو بندیزونه لګولي، چې د میندو د مړینې له لوړې کچې سره مخ دی.
د دغه سازمان په خبره، د طالبانو دا پرېکړه د ښځو د روغتیا لپاره خطرناکې او ویجاړوونکې پایلې لري.
د طالبانو مشر ملا هبت الله اخوندزاده د دوشنبې په ورځ په رسمي توګه په طبي انسټیټوټونو کې د نجونو زده کړې منع کړې.
د نوموړي دغه پرېکړه د طالبانو ترمنځ د اختلافونو او په څو ډلو د وېشلو لامل شوی دی.
ټاکل شوې ده، چې په همدې تړاو په کندهار ولایت کې د لوړپوړو طالب چارواکو ترمنځ غونډه وشي.
په دې اړه د طالبانو چوپتیا
طالب چارواکو د هبت الله د دې پرېکړې د اقدام په اړه هېڅ ډول توضیحات نه دي ورکړي.
د طالبانو د عامې روغتیا وزارت د دوشنبې په ورځ په افغانستان کې ټولو طبي انسټیټوټونو ته دستور ورکړ، چې دغو مراکزو ته د نجونو د ورتلو مخه ونیسي.
نور ولولئ: د بښنې نړیوال سازمان طالبانو ته؛ د نجونو پر مخ ښوونځي پرانیزئ
نور ولولئ: د بښنې نړیوال سازمان: پاکستانی ریاست دې پر پي ټي اېم لګولي بندیزونه ختم کړي
د طالبانو دا پرېکړه د ښځینه محصلینو د سختې غوسې لامل شوې ده.
ښځینه زده کړیانو رسنیو ته په استول شویو پیغامونو کې ویلي، چې د طالبانو دغه پرېکړه د دوی پر روحیې تر ټولو سخت ګوزار دی.
جنسیتي تبعیض
د بخښنې نړۍوال سازمان د ښځو او نجونو پروړاندې د دې فرمان لامل د هغوی د جنسیت له امله بولي.
یاد سازمان د سې شنبه په ورځ وویل: «زده کړې د بشر له اساسي حقونو ګڼل کېږي چې طالبان یې په پرله پسې توګه تر پښو لاندې کوي.»
د بخښنې نړۍوال سازمان په یوې اعلامیه کې ویلي: «دغه بندیزونه سره له دې چې د نجونو د زده کړو په برخه کې وروستۍ لارې بندوي، د ښځو د سلامت په برخه کې هم خطرناکې او ویجاړوونکې پایلې لري او افغانستان داسې یو هېواد دی چې په کې د میندو د مړینې کچه هم لوړه ده.»
ښځینه زده کړیانو په بېلابېلو پیغامونو کې له طالبانو غوښتي، چې پر نجونو دغه بندیزونه لرې کړي.
دوی وایي، چې د پوهنتونونو وروسته د دوی یوازینۍ هیله انسټیټوټونه و، خو دغه مراکز هم وتړل شول.
دا په داسې حال کې ده چې په نږدې راتلونکې کې به په افغانستان کې د مور او ماشوم مړینه خپل اوج ته ورسېږي.
